I. Tasmaǵambetov Qarýly Kúshterdegi úzdik rota komandırlerin marapattady (FOTO)
Bul týraly Qorǵanys mınıstrliginiń baspasóz qyzmeti habarlady.
Ústimizdegi jyldyń basynda QR Qarýly Kúshterinde úzdik rota komandıri ataǵyna jalpy áskerı baıqaý ótti. Kásibı sheberlikteri men komandırlik qasıetterin QR QK ásker tekteri men óńirlik qolbasshylyqtardyń ofıtserleri sarapqa saldy. Úzdik rota komandıri ataǵyna úmitkerler memlekettik-quqyqtyq, atys, dene, taktıkalyq jáne arnaıy daıarlyqtar, áskerı topografııa, qarý-jaraq pen áskerı tehnıka boıynsha bilimderinen synaqtardy sátti tapsyrýy tıis bolatyn.
«On bes ofıtser túrli mamandyqtar boıynsha «Úzdik rota komandıri» ataǵyna laıyq dep tanyldy. Barshańyz óz kásibı jáne jaýyngerlik sheberlikterińizdi, Otan aldyndaǵy laıyqty qyzmetterińizdi kórsete bildińizder. Degenmen sizder eń bastysy úzdik komandır ǵana emes, óz jaýyngerlerińiz úshin naǵyz tálimger sondaı-aq, búkil jeke quramǵa úlgisizder. Sizderge qarap rota sap túzeıdi. Ár jaýynger sizderdi áskerı borysh pen aıbynnyń ıdealy dep biledi. Jaýyngerler úshin sizder komandır ǵana emes armııa sapyndaǵy talap ete biletin, qajet kezinde qoldaý kórsetetin eń jaqyn adamsyzdar», - dedi saltanatty rásimde QR Qorǵanys mınıstri.
Osy oraıda qorǵanys vedomstvosynyń basshysy úsh ofıtserge - aǵa leıtenanttar Meıirhat Bısatov, Ernar Qýanyshqalıuly jáne Evgenıı Paıǵa merziminen buryn «kapıtan» ataǵyn berip, barlyq on bes áskerı qyzmetshige gramotalar men estelik syılyqtar (komandır saǵattaryn) tabys etti.