I.Tasmaǵambetov: Elordaǵa syıymdylyǵy 60 myń tonnalyq kókónis saqtaý qoımasy qajet
ASTANA. QazAqparat - Elordaǵa syıymdylyǵy 60 myń tonnalyq kókónis saqtaý qoımasy qajet. Bul týraly búgin Elbasy Nursultan Nazarbaevtyń tóraǵalyǵymen ótip jatqan elordanyń odan ary damýyna arnalǵan keńeste qala ákimi Imanǵalı Tasmaǵambetov málim etti.
«Qazir qalaǵa kólemi 60 myń tonnalyq kókónis saqtaý qoımasy qajet. Byltyr 22 myń tonnalyq syıymdylyǵy bar úsh nysan óz jumysyn oıdaǵydaı atqardy», - dedi I.Tasmaǵambetov.
Ákim aqparatyna qaraǵanda, aǵymdaǵy jyly syıymdylyǵy 13 myń tonnany quraıtyn úsh kókónis qoımasyn paıdalanýǵa berý josparlanyp otyr.
«Al qala qajettigin 2016 jylǵa qaraı tolyq óteý úshin kólemi 32 myń tonnany quraıtyn taǵy 6 kókónis qoımasyn salý qajet», - dedi elorda basshysy.
Sondaı-aq I.Tasmaǵambetovtiń atap ótýinshe, elordanyń maýsymaralyq jylyjaı ónimderine qajettiligi 8 myń tonnaǵa teń. Qazirgi ýaqytta qýaty 2,5 myń tonnalyq 2 jylyjaı jumys isteýde.
«2015 jyly qýaty 6,9 myń tonnalyq 3 jylyjaı qurylysy aıaqtalmaq», - dedi qala ákimi .
Sonymen qatar elorda basshysynyń atap ótýinshe, ótken jyly Astanada jalpy aýmaǵy 6 gektardy quraıtyn 12 saıabaq ashylǵan jáne qaıta qalpyna keltirilgen. Bıyl 13 saıabaq pen 2 baq ashý ári jóndeý josparlanyp otyr.
