«I’m from Qazaqstan»: Baıqaýǵa 200-den astam vıdeorolık tústi
«Jastar jyly» aıasynda «A kind heart» qoǵamdyq birlestigi qolǵa alǵan jobaǵa Qazaqstannyń túkpir-túkpirinen 969 ótinim túsip, 233 adam tolyqqandy vıdeoblog túsirgen. Olardyń 15-i ǵana aqtyq synǵa ótken.
Baıqaý sharty boıynsha qatysýshylar óziniń týǵan qalasy nemese aýyly týraly beınerolık túsirip, onda kórikti jerlerdi kórsetýi, týrıster úshin qyzyqty málimetter usynýy kerek bolatyn.
«Úmitkerlerdiń 40 paıyzy - Almatydan, 13 paıyzy - Nur-Sultannan. Qalǵan jumystar Óskemen, Shymkent, Semeı, Aqtaý, Kókshetaý, Qaraǵandy, Býrabaı, Qostanaı, Túrkistan, Pavlodar qalalarynan tústi. Aýdandar men aýyldardan da rolık jibergender bar. Olardyń jumysyn quramyna belgili sheteldik jáne otandyq blogerler engen qazylar alqasy baǵalaıdy», - deıdi «A kind heart» qoǵamdyq birlestigi taratqan aqparatta.
Buǵan deıin habarlaǵanymyzdaı, eń úzdik vıdeorolık avtory bas júldege 1 mln teńge alady. Ekinshi orynǵa – 500 myń teńge, úshinshi orynǵa 300 myń teńge beriledi. Báıge qorytyndysy boıynsha, fınalǵa jetken qatysýshylar Qazaqstandaǵy YouTube kompanııasynyń resmı ókilimen kelisimshartqa otyryp, óz arnalarynyń daýmyna qatysty mamandardan keńes alady. Jeńimpazdardy quttyqtaý saltanatty rásimi 24-25 tamyzda Nur-Sultan qalasynda uıymdastyrylatyn «Qazaqstandy asha otyryp» atty halyqaralyq blogerler forýmynda ótedi.
Baıqaý Azamattyq bastamalardy qoldaý ortalyǵy men QR Aqparat jáne qoǵamdyq damý mınıstrliginiń qoldaýymen iske asyrylýda.
