I.Ilındi marapattaý rásiminde taǵy da Qazaqstannyń eski ánurany oınaldy
ASTANA. QazAqparat - Búgin Groznyı qalasynda ótken aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnırde erler arasyndaǵy 105 kelige deıin salmaqta baq synaǵan Ilıa Ilın 2 márte álem rekordyn jańartyp, jeńimpaz atanǵan bolatyn. Taǵy bir sportshymyz Aleksandr Zaıchıkov kúmis medal ıelengen edi.
Jeńimpazdardy ulyqtaý rásiminde Qazaqstannyń eski ánurany taǵy da oınaldy. Bastapqyda jeńis tuǵyrynda turǵan Aleksandr men Ilıa túsinbeı qalyp, bir-birine qarady. Osydan keıin Ilıa jarysty uıymdastyrýshylar men marapattaýǵa shyqqan azamattarǵa bul eski ánuran ekenin aıtty. Osylaısha Ilıanyń tabandylyǵynyń arqasynda 2-3 mınýttyq úzilisten keıin elimizdiń jańa ánurany shyrqaldy.
Buǵan deıin habarlaǵanymyzdaı, Ilıa alǵashqy julqa kóterý saıysynda 191 kelini baǵyndyryp, birinshi orynǵa taban tiregen bolatyn. Al ekinshi jattyǵýda ol alǵashqy múmkinshiliginde-aq qarsylastarynan oq boıy ozyq bolyp, 231 kelini baǵyndyrdy. Osydan keıin altyn medal Ilıanyń qanjyǵasyn maılaǵan edi. Biraq ol táýekelge baryp birden 246 kelige tapsyrys berdi jáne ony erkin eńserdi. Este bolsa, ótken jyly Almatyda ótken álem chempıonatynda Ilıa Ilın 242 kelini baǵyndyryp, álem rekordyn ornatqan bolatyn. Al araǵa bir jyl ýaqyt salyp dańqty sportshymyz óz rekordyn jańartyp otyr. Qos saıystyń nátıjesinde de Ilıa 437 keli kóterip jańa rekord ornatty. Al dál osy salmaq sanatynda jarys jolyna shyqqan taǵy bir sportshymyz, álem chempıony Aleksandr Zaıchıkov julqa kóterýde 190, serpe kóterýde 226 kelini baǵyndyrdy. Osylaısha ol eki jattyǵýdyń qorytyndysynda kúmis medaldi qanjyǵasyna baılady. Úshinshi oryn eki jattyǵýda 411 keli kótergen reseılik ziltemirshi Tımýr Nanıevke buıyrdy.
