I.Ilın Astanada álemniń úzdik aýyr atletterine arnalǵan nagradany alady
ASTANA. QazAqparat - 2014 jyldyń úzdik aýyr atletteri atanǵan Ilıa Ilın men Tatıana Kashırına álemniń úzdik aýyr atletterine arnalǵan nagradalardy Qazaqstanda ótetin arnaıy rásimde alady, dep habarlady QR Aýyr atletıka federatsııasynyń baspasóz qyzmetinen.
Álemniń úzdik ziltemirshilerine beriletin Ieno Boskovıch atyndaǵy dástúrli júldeni IWF-nyń Qazaqstandaǵy ókilderi tabystaıdy. Daýys berý qorytyndylary boıynsha jeńimpazdar bolyp Olıpıadanyń eki dúrkin chempıony Ilıa Ilın men reseılik Tatıana Kashırına atandy. Bul eki sportshy 2014 jylǵy álem chempıonatynyń jeńimpazdary bolǵan.
«Jyldyń úzdik aýyr atleti» ataǵynyń laýreattaryn marapttaý rásimi Astanada 24 sáýirde ótedi. Rásimge qatysý úshin Halyqaralyq aýyr atletıka federatsııasynyń (IWF) prezıdenti Tomash Aıan men IWF vıtse-prezıdenti Nıký Vlad, sondaı-aq "World weightlifting" jýrnalynyń qyzmetkerleri keledi. Atalǵan shara IWF, QR Mádenıet jáne sport mınıstrligi jáne sporttyq jekpe-jekter men kúsh qoldanatyn túrleriniń konfederatsııasynyń qoldaý kórsetýimen ótedi.
Atap óteıik, Tatıana Kashırına bul nagradany qatarynan ekinshi ret, Ilıa Ilın bolsa - úshinshi ret alady. Buǵan deıin qazaqstandyq shtangashylardyń arasynda bul júldege Zúlfııa Chınshanlo laıyq dep tanylǵan.
