І, ІІ toqsannyń oqý materıaldary ınternet platformaǵa engizilip qoıdy - mınıstr

NUR-SULTAN. QazAqparat – Qashyqtan bilim berý boıynsha vıdeo-sabaqtardy túsirý, tsıfrlyq bilim berý resýrstaryn daıyndaý jumystary júrgizilýde. Bul týraly Ortalyq kommýnıkatsııalar qyzmetinde onlaın ótken brıfıngte QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Internet platforma týraly da másele bar. Internet platformany jetildirý týraly pedagogtardy, ata-analardyń usynystaryn tyńdadyq. Qazirgi ýaqytta ІT- kompanııalarmen kelissóz júrgizilip, olar ınternet platformany jańǵyrtý boıynsha jumystar júrgizip jatyr», - deıdi Bilim jáne ǵylym mınıstri Ashat Aımaǵambetov.

Onyń aıtýynsha, jańa oqý jylynyń birinshi, ekinshi toqsany boıynsha oqý materıaldary ınternet platformaǵa engizilip qoıdy. Endi osy sabaqtar erekshe qajettiligi bar oqýshylar úshin qoljetimdi bolýy úshin jumystar atqarylyp jatyr.

«Biz qosymsha sýrdo-aýdarmamen qamtamasyz etý, shrıft kólemin ulǵaıtý týraly aıttyq. Bul máseleler bizdiń tarapymyzdan eskerildi. Vıdeo-sabaqtardy túsirý, tsıfrlyq bilim berý resýrstaryn daıyndaý jumystary júrgizilýde», - deıdi ol.