I.Dychko kishi Klıchkomen «tóbelesip» qaldy
ASTANA. QazAqparat - Qazaqstannyń asa aýyr salmaqtaǵy boksshysy Ivan Dychko Avstrııanyń Goıng qalasynda, Vladımır Klıchkonyń bazasynda birneshe eldiń boksshylarymen birge jattyǵýda.
Asa aýyr salmaqtaǵy boksshylardyń barlyǵy da kásibı rıngte judyryqtasyp júrgen tanymal sportshylar bolsa, olardyń arasynda tek Ivan ǵana áýesqoı bokspen aınalysady, dep habarlady QR Boks federatsııasynyń baspasóz qyzmetinen.
Federatsııa aqparatyna qaraǵanda, jattyǵý tańǵy saǵat 7-de bastalady. Osy ýaqyttan bastap barlyq boksshylar jeke baǵdarlama boıynsha jattyǵady. Al keshisin boksshylar arasynda sparrıng ótkiziledi. Árbir boksshysy V.Klıchkomen 2-3 raýnd judyryqtasýy tıis. Búgingi kúnge deıin Ivan kishi Klıchkomen úsh raýndtyq sparrıng ótkizip úlgerdi. "Bári de durys. Jekpe jekten keıin ol men maqtady. Biraq, bul maqtanýǵa esh múmkindik bermeıdi», - deıdi kezdesýden keıin Ivan.
Aıta keterligi, taıaý kúnderi Ivan kishi Klıchkomen taǵy bir jekpe-jek ótkizetin bolady. Goıngtegi jattyǵý 28 shildege deıin jalǵasady.
