Hıýstondaǵy qazaq qaýymdastyǵy alǵash ret Naýryz merekesin toılady
AQTAÝ. KAZINFORM – Hıýston qalasynda alǵash ret qazaqstandyq ártister anshlagpen kontsert ótkizdi. Bir sahnada Eńlik, Sadraddın, Raýana jáne Qurmanǵazy atyndaǵy Qazaq ulttyq halyq aspaptar orkestriniń bas dırıjeri Abylaı Tilepbergen óner kórsetti. Texas Qazaq Foundation uıymynyń uıymdastyrýymen ótken bul shara Naýryz meıramynyń negizgi oqıǵasyna aınalyp, jergilikti qazaq qaýymdastyǵynyń mádenı ómirinde jańa kezeńniń bastalýyn kórsetti.
Buǵan deıin Naýryz merekesi qalada basqa Ortalyq Azııa dıasporalarymen birge atap ótilse, bıyl alǵash ret qazaqstandyq qaýymdastyqtyń jeke is-sharasy retinde ótkizildi.
Kontsertke myńǵa jýyq adam jınaldy. Abylaı Tilepbergenniń dombyrada oryndaǵan kúılerin kórermen erekshe yqylaspen tyńdady. Ol halyqtyń kúıge degen saǵynyshyn sezingenin jáne kórermenderdiń qoldaýyn joǵary baǵalaǵanyn aıtty. Keshtiń jalǵasynda zamanaýı qazaqstandyq mýzyka oryndaldy. Raýana yrǵaǵyn ornatyp, Eńlik sahnaǵa shyqqanda kórermender bılep, emotsııalaryn bildirdi. Sadraddınniń óner kórsetýi kezinde zaldaǵy barlyq jastaǵy tyńdarmandar ánderdi birge shyrqady. Bul shara sahna men kórermen arasyndaǵy shekarany joıyp, otbasylyq merekeni eske saldy.
Bıylǵy Naýryz merekesi amerıkalyq Pasha meıramymen qatar toılandy. Eki merekeniń de ortaq maǵynasy – jańarý, birlik jáne urpaqtar sabaqtastyǵy. Kontsertke kelgen stýdent Gúljan ózimen birge turatyn amerıkalyq otbasyn ertip keldi. Bıýkenon otbasy Pasha men Naýryzdyń jańarý men jańa kezeńniń bastalýy maǵynasyna ıe ekenin atap ótti.
Qonaqtar arasynda dıaspora ókilderimen qatar amerıkalyqtar men Stafford qalasynyń merııa qyzmetkerleri de boldy. Kópshilik qazaq mýzykasynyń biregeıligin jáne uıymdastyrý deńgeıiniń joǵary ekenin atap ótti.
Uıymdastyrýshylar is-sharanyń árbir bólshegine mán bergen. Zalda kıiz úıler qoıylyp, ulttyq kıimder, dástúrli turmys elementteri men taǵamdar usynyldy. Bul amerıkalyq qonaqtar úshin Qazaqstan mádenıetimen alǵashqy tanystyq boldy. AQSh-ta týǵan jas qazaqstandyqtar úshin bul kesh zamanaýı qazaq sahnasymen alǵashqy tanysý alańyna aınaldy.
Texas Qazaq Foundation – kommertsııalyq emes uıym, ol aımaqta Qazaqstandy nasıhattap, dıaspora arasyndaǵy baılanystardy nyǵaıtýǵa baǵyttalǵan. Hıýstonda shamamen 10 myńǵa jýyq qazaqstandyq turady. Qordyń negizgi jobalarynyń biri – 10 jyldan astam jumys istep kele jatqan qazaq mektebi, onda qazirgi ýaqytta 70-ke jýyq bala oqıdy. Olar qazaq tilin úırenip, dástúrlerdi, dombyra tartýdy jáne ulttyq bılerdi meńgeredi.
Uıymdastyrýshylardyń aıtýynsha, kontsert úlken eriktiler jumysynyń nátıjesi bolyp tabylady. Bul shara qazaqstandyqtar úshin mádenı ortalyqqa aınalyp, halyqaralyq deńgeıde Qazaqstan mádenıetin tanytý múmkindigin berdi. Hıýstondaǵy kesh Otannan alysta bolsa da, dástúrdiń kúshi adamdardy biriktirip, túrli mádenıetterdiń júreginde oryn alatynyn kórsetti.
Eske sala keteıik, buǵan deıin Beıjińde Naýryz meıramy toılanǵanyn jazǵan edik.
