Hıýstonda Qazaqstannyń Respýblıka kúni toılandy
ASTANA. KAZINFORM — Hıýstonda Qazaqstan Respýblıkasynyń kúni atalyp ótti. Kesh Qazaqstan men AQSh-tyń memlekettik ánurandaryn oryndaýmen bastalyp, eki el arasyndaǵy dostyqty dáriptedi, dep habarlaıdy Kazinform agenttiginiń menshikti tilshisi.
Saltanatty keshte qala ákimshiliginiń ókilderi mer Djon Ýıtmaırdyń atynan Texas Qazaq Foundation qoryna Qazaqstannyń ulttyq merekesine arnalǵan resmı qujatty tabystady.
Kesh barysynda Qazaqstannyń Hıýstondaǵy Bas konsýly Ǵabıdýlla Ospanqulov jaqyn arada qalada Qazaqstannyń konsýldyq ókildigi ashylatynyn málimdedi.
– Prezıdent Qasym-Jomart Toqaevtyń tapsyrmasyna sáıkes, Hıýstonda Qazaqstannyń resmı konsýldyq ókildigi ashylady. Jaqyn ýaqytta ókildik óz jumysyn bastaıdy, – dedi Ǵabıdýlla Ospanqulov.
Bul qadam qazaqstandyqtardyń tarıhı Otanymen baılanysyn nyǵaıtyp, yntymaqtastyqty damytýǵa jańa múmkindikter ashady.
AQSh Saýda qyzmetiniń Hıýstondaǵy ókildiginiń dırektory Djeıson Ýılsonnyń aıtýynsha, 2025 jyly AQSh pen Qazaqstan arasyndaǵy taýarlar men qyzmetterdiń saýda kólemi alǵash ret 7 mlrd dollardan asqan.
Sonymen qatar shelde qazaq tilin, mádenıeti men ulttyq dástúrlerin dáripteýge erekshe mán berildi. AQSh-taǵy alǵashqy qazaq mektebi – Houston Qazaq School oqýshylary qazaq bılerin bılep, án aıtyp, kúı tartty. 15 jylǵa jýyq tarıhy bar mektep alǵashynda 10 oqýshymen jumysyn bastasa, búginde 80-ge jýyq balany qamtyp otyr. Jastar da AQSh-taǵy qazaqtar arasyndaǵy baılanysty nyǵaıtyp, ulttyq mádenı murany saqtaýǵa baǵyttalǵan jobalardy júzege asyryp jatyr.
Budan bólek merekeni uıymdastyrýǵa qoldaý kórsetken 12 qazaqstandyq kásipkerdiń úlesi zor boldy. Tehastaǵy qazaqstandyqtardy biriktiretin Texas Qazaq Foundation qory Steppe Business Club bıznes-klýby men stýdentter forýmyn qosa alǵanda, iskerlik jáne bilim berý jobalaryn damytyp keledi.
Qor aldaǵy ýaqytta mádenı is-sharalar ótkizip, jas urpaqty qoldaýǵa arnalǵan qazaqtyń qoǵamdyq ortalyǵyn ashýdy josparlap otyr.
Keshtiń eń jarqyn sáti qazaqstandyq ánshi Mıras Júginisovtiń kontserti boldy. Onyń ónerin tamashalaýǵa kópshilik jınaldy. Ataýly mereke ulttyq birlikti, Qazaqstanǵa degen maqtanysh sezimin jáne eki el arasyndaǵy dostyqty dáriptedi. Respýblıka kúniniń resmı moıyndalýy men Hıýstonda Qazaqstannyń konsýldyq ókildiginiń ashylýy qazaq qaýymy úshin mańyzdy qadam boldy. Bul bastamalar sheteldegi qazaqtardyń tarıhı tamyrymen baılanysyn saqtap, amerıkalyqtarǵa Qazaqstan mádenıetin tanytýǵa jol ashady.
Eske sala keteıik, buǵan deıin Respýblıka kúnine oraı Nıý-Iorkte Qazaqstan Týy kóterildi.
