Hyperloop synaqtan sátti ótti: ushaqtan jyldam poıyz shyndyqqa aınalýy múmkin
ASTANA. KAZINFORM — Berlın — Mıýnhen baǵyty boıynsha jolaýshylar ushaǵy shamamen 1 saǵat 15 mınýtta ushady. Al Hyperloop poıyzymen bul joldy teorııalyq turǵydan 45 mınýtta eńserýge bolady, dep habarlaıdy BILD.
Nıderlandtyq ınjenerler qubyr arqyly asa jyldam sapar jasaý ıdeıasyn júzege asyrýǵa mańyzdy qadam jasady. Vendam qalasyndaǵy European Hyperloop Center ortalyǵynda synaq kapsýlasy 85 km/saǵ jyldamdyqqa jetip, alǵash ret jol aýystyrýdy sátti oryndady.
— Bul Hyperloop-tyń ári qaraı damýy úshin mańyzdy kezeń, — deıdi Hardt Hyperloop startapynyń teń quryltaıshysy Tım Haýter.
Bir jyl burynǵy synaqtarda nebári 30 km/saǵ shamasynda ǵana jyldamdyqqa qol jetkizilgen edi. Ázirleýshilerdiń pikirinshe, qubyrdyń uzyn ýchaskelerinde kapsýla bir kúni 700 km/saǵ jyldamdyqqa deıin jetýi múmkin.
Hyperloop-tyń jumys prıntsıpi qarapaıym: kapsýlalar derlik vakýýmdyq qubyrlarda syrǵıdy, sondyqtan úıkelis pen aýa kedergisi barynsha azaıady. Ony elektrqozǵaltqysh ilgeriletedi. Bul — óte jyldam ǵana emes, sonymen birge únsiz, energııany únemdeıtin ári ekologııalyq taza kólik túri.
— Bizdiń maqsatymyz — qysqa áýe saparlaryn qajetsiz etý, — dedi Haýter.
Ázirleýshiler Hyperloop-tyń eń úlken áleýetin Eýropada kórip otyr: birneshe júz shaqyrymdyq qashyqtyq, halqy tyǵyz ornalasqan óńirler, iri áýejaılar — dál osy jerlerde qubyr poıyzynyń artyqshylyǵy aıqyn baıqalady.
Alaıda tehnologııa kúrdeli, shyǵyn kóp, al halyq tyǵyz qonystanǵan aýdandarda qurylysqa ruqsat alý ońaı emes. Soǵan qaramastan, Germanııa men Italııada pılottyq baǵyttardy qurý jospary bar.
Vendamda synaq úshin uzyndyǵy 420 metrlik qubyr salynǵan. Synaqtaǵy eń basty jetistik — kapsýlanyń jol aýystyrýdy sátti oryndaýy. Bul múmkindik tolyqqandy eýropalyq jeli qurý úshin sheshýshi ról atqarady.
Biz Hyperloop-tyń endi qııal emes ekenin kórsettik. Bul salýǵa bolatyn tehnologııa, — dedi Haýter.
Aıta ketelik Beıjińde 12-shi Dúnıejúzilik joǵary jyldamdyqty temirjol konferentsııasy ótip, ol jerde saǵatyna jyldamdyǵy 600 shaqyrymdyq poıyz kórsetilgen edi.