HVQ jasandy ıntellekt pen qaqtyǵystardyń álemdik ekonomıkaǵa tóndiretin qaýpi týraly eskertti
ASTANA. KAZINFORM — Halyqaralyq valıýta qorynyń (HVQ) basshysy Krıstalına Georgıeva jasandy ıntellektiniń damýy, áskerı qaqtyǵystar jáne qaryz júktemesiniń artýy saldarynan ekonomıkalyq táýekelder kúsheıip jatqan tusta álem kóshbasshylaryn yntymaqtastyqqa úndedi. Bul týraly Kazinform agenttigi Reuters-ke silteme jasap habarlady.
16 qazanda Bangkokte ótken Halyqaralyq valıýta qory men Dúnıejúzilik banktiń jyl saıynǵy jıynynda sóz sóılegen Krıstalına Georgıeva tehnologııalardyń qarqyndy damýy álemdik ekonomıkaǵa jańa syn-qaterler ákelip otyrǵanyn atap ótti.
Onyń aıtýynsha, jahandyq saýdadaǵy irkilister, azyq-túlik pen energııa resýrlary baǵasynyń joǵarylyǵy, sondaı-aq jalǵasyp jatqan qarýly qaqtyǵystar damyǵan jáne kedeı elder arasyndaǵy alshaqtyqty ulǵaıtýy múmkin.
— Qazir halyqaralyq deńgeıde shuǵyl ári naqty yntymaqtastyq qajet, — dedi HVQ basshysy.
Georgıevany ásirese jasandy ıntellektiniń qarqyndy damýy alańdatady. Ol jańa tehnologııalardy retteý qajettigin atap ótip, damýshy elderdiń qolaısyz jaǵdaıda qalmaýy keregin aıtty.
Buǵan deıin HVQ 2026 jyly álemdik ekonomıkanyń ósý boljamyn sál kóterip, 3,1% deńgeıinde baǵalady. Soǵan qaramastan, bul kórsetkish tarıhı ortasha deńgeıden edáýir tómen. Qor negizgi táýekelder qataryna jasandy ıntellekt salasyndaǵy ınvestıtsııalyq serpinniń báseńdeýin, memlekettik qaryzdyń ósýin jáne Taıaý Shyǵystaǵy qaqtyǵystyń jalǵasýyn jatqyzdy.
HVQ málimetinshe, Taıaý Shyǵystaǵy áskerı áreketter men Irannyń Ormýz buǵazyn jabýy álemdik energetıka naryǵynda eleýli dúrbeleń týǵyzdy. Osy faktorlar bolmaǵanda, jasandy ıntellektiniń damýy ekonomıkalyq ósim qarqynyn odan ári arttyrýy múmkin edi.
Sonymen birge AQSh ókilderi HVQ-ny álemdik ekonomıkadaǵy oń úrdisterge kóbirek nazar aýdarýǵa shaqyrdy. AQSh Qarjy mınıstriniń orynbasary Erın Braýn el ekonomıkasynyń turaqty ósýi jahandyq qarjylyq turaqtylyqqa yqpal etetinin málimdedi.
— HVQ álemdik ekonomıkanyń damý perspektıvalaryn baǵalaýda teńgerimdi tásildi ustanýy kerek, — dedi ol.
Jasandy ıntellekt salasyndaǵy ınvestıtsııalardyń turaqtylyǵyna qatysty alańdaýshylyq qor naryqtaryna da áser etip otyr. Reuters dereginshe, Ońtústik Koreıanyń qor naryǵy keıingi 18 jyldaǵy eń úlken aptalyq quldyraýdy kórsetti, al Japonııa naryǵy 5,4%-ǵa tómendedi.
Budan bólek, HVQ damýshy memleketterdiń qarjylyq qoldaýǵa degen suranysy artyp kele jatqanyn habarlady. Qordyń Strategııa departamentiniń dırektory Krıstıan Mýmmsenniń aıtýynsha, tabysy tómen elderge beriletin jeńildetilgen nesıeler kólemi COVID-19 pandemııasyna deıingi kezeńmen salystyrǵanda tórt ese ósken.
Pandemııa bastalǵaly beri HVQ qarjylandyrýynyń shamamen 60%-y tabysy tómen elderge baǵyttalǵan.
Qor ekonomıkalyq belgisizdik saqtalǵan jaǵdaıda jeńildetilgen nesıege suranys joǵary deńgeıde qalady dep boljap otyr.
Eske salaıyq, buǵan deıin bolashaqta JI-agentter jeke qyzmetkerlerdiń múmkindigin birneshe ese arttyrady jáne bir adam basqarsa da, quny ondaǵan mıllıon, tipti mıllıardtaǵan dollarǵa baǵalanatyn kompanııalar paıda bolýy múmkin ekenin jazǵanbyz. Bul týraly BAÁ-niń Jasandy ıntellekt máseleleri jónindegi mınıstri Omar ál-Olama málimdedi.
