HVQ usynymdary baıypty sheshim qabyldaýymyzǵa kómektesti - Jumanǵarın
ASTANA. KAZINFORM – Vıtse-premer – ulttyq ekonomıka mınıstri Serik Jumanǵarın Halyqaralyq valıýta qorynyń Qazaqstan boıynsha mıssııasynyń basshysy, Taıaý Shyǵys jáne Ortalyq Azııa elderi departamenti Ortalyq Azııa elderi basqarmasynyń bastyǵy Álı ál-Eıdpen kezdesti.
Dıalog barysynda vıtse-premer HVQ-nyń Kelisim baptary sheńberindegi turaqty taldamalyq jumysy úshin, Ulttyq Bank pen Qarjy naryǵyn retteý jáne damytý agenttigi syndy Qazaqstannyń taǵy da memlekettik organdarynda konsýltatsııalar ótkizip, tehnıkalyq kómekter kórsetkeni úshin rızashylyǵyn bildirdi.
«Bizdiń Halyqaralyq valıýta qorymen uzaq merzimdi áriptestigimiz makroekonomıkalyq turaqtylyqty qamtamasyz etip, ekonomıkalyq ósýdiń birqalypty arhıtektýrasyn qalyptastyrýda mańyzdy ról atqarady. Qordyń usynymdary bizdiń baıypty sheshim qabyldaýymyzǵa kómektesse, ózara yntymaqtastyǵymyz ınstıtýtsıonaldyq reformany ilgeriletip, makroekonomıkalyq jáne makroprýdentsıaldyq saıasatty jetildirýge járdemdesedi», — dedi Serik Jumanǵarın.
Ol HVQ mıssııasy basshysyn qurylymdyq reformalardyń barysymen, sonyń ishinde kúshine engen Bıýdjet jáne Salyq kodeksteriniń júzege asyrylýy, qarjy naryǵynyń damýy, sondaı-aq Úkimettiń, Ulttyq banktiń jáne QNRDA-nyń 2026-2028 jyldarǵa arnalǵan jańa birlesken is-qımyl baǵdarlamasynyń negizgi baǵyty týraly habardar etti. Sonymen qatar jańartylǵan makrokórsetkishtermen tanystyrdy. 2024 jyldyń qorytyndysy boıynsha JІÓ ósimi 4,8%, al 2025 jylǵy 10 aıda – 6,4% boldy.
Álı ál-Eıd HVQ-nyń Qazaqstanmen yntymaqtastyq deńgeıin joǵary baǵalap, salyq reformasyn júrgizý, fıskaldyq ustanymdy nyǵaıtý, ekonomıkalyq ósýdiń joǵary qarqynyn qoldaý men uzaq merzimdi strategııalyq paıymdy qalyptastyrýdaǵy eldiń eleýli ilgerileýin atap ótti. Sonymen birge ol ınflıatsııany odan ári tómendetý qajettigine, onyń kóp komponentti sıpaty men syrtqy faktorlardyń áserine nazar aýdardy.
Taraptar taldamalyq jáne saraptamalyq almasýdy nyǵaıtý, sondaı-aq ornyqty ekonomıkalyq ósýdi qoldaý jónindegi birlesken jumysty damytý sekildi aldaǵy ózara is-qımyl perspektıvasyn talqylady.
Kezdesý syndarly, áriptestik raıda ótti. Bul Qazaqstan men Halyqaralyq Valıýta Qory arasyndaǵy tyǵyz dıalogty jalǵastyrýǵa jáne yntymaqtastyqty tereńdetýge degen ózara kózqarasty aıǵaqtaıdy.
Aıta keteıik, HVQ Reseı ekonomıkasynyń 2025 jylǵa arnalǵan boljamyn tómendetti.