HVQ-nyń Almaty ortalyǵy Qazaqstanǵa qandaı paıda ákeledi
ASTANA. KAZINFORM – Elimiz Halyqaralyq valıýta qorynyń Kavkaz, Ortalyq Azııa jáne Mońǵolııa úshin áleýetti damytýdyń óńirlik ortalyǵyna 5 jylda 20 mln dollar qarjy quıdy. Bul týraly Ulttyq bank tóraǵasy Tımýr Súleımenov aıtty.
Búgin Májilistiń jalpy otyrysynda «Qazaqstan Respýblıkasy men Halyqaralyq valıýta qory arasyndaǵy Kavkaz, Ortalyq Azııa jáne Mońǵolııa úshin áleýetti damytýdyń óńirlik ortalyǵyna qatysty ózara túsinistik jónindegi memorandýmdy ratıfıkatsııalaý týraly» Zańnyń jobasy aralyp otyr.
Qujatty talqylaý barysynda depýtat Ulasbek Sádibekov Ulttyq bank basshysynan: «Usynylǵan materıaldarda Halyqaralyq valıýa qorynyń Áleýetti damytýdyń óńirlik ortalyǵy Kavkaz, Ortalyq Azııa jáne Mońǵolııa elderine qyzmet kórsetetini, memlekettik organdardy oqytýmen, taldaýmen, áleýetin arttyrýmen aınalysatyny kórsetilgen. Osyǵan baılanysty bul ortalyqty Almatyda ornalastyrý Qazaqstanǵa naqty qandaı artyqshylyq beredi? Sondaı-aq ortalyqty ornalastyrý kezinde Qazaqstan ózine qandaı mindettemelerdi alady? Máselen, qarjylyq, ınfraqurylymdyq, uıymdastyrýshylyq jáne bul uzaq merzimdi me?», - dep suraǵan edi.
Saýalǵa jaýap bergen Ulttyq bank tóraǵasy aldymen elimizdiń qarjylyq mindettemesine toqtaldy.
- Osy 5 jyl ishinde ortalyqty qarjylandyrýǵa baǵyttalǵan qarajat kólemi 48 mln dollar boldy. Onyń ishinde Qazaqstan úlesi - 20 mln dollar, ıaǵnı jylyna orta eseppen 4 mln dollar, al qalǵanyn áriptester men qordyń ózi qarjylandyrdy. Ár 5 jyl saıyn qarjylyq jospar kelisilip, bekitiledi. Osy jyldyń sońyna deıin áritestermen jáne qormen aqyldasyp, kelisip, jańa qarjy josparyn bekitemiz, - dedi ol.
Sonymen qatar Tımýr Súleımenov atalǵan ortalyqtyń elimizge paıdasyna da jeke toqtaldy.
- Eń bastysy árıne, joǵary bilikti qarjy jáne ekonomıka mamandaryn oqytýǵa múmkindik bolady. Endi biz Vashıngton, Vena qalasyna barmaı, eń úzdik halyqaralyq tájirıbege, bilimge qol jetkize alamyz. Buryn bıýdjet aqshasyn paıdalanyp baratynbyz. Endi Almaty qalasynda osyndaı ortalyq bar. Eń bastysy 9 eldiń arasynda Almaty qalasy tańdaldy. Ortalyq Qazaqstannyń qarjy haby rólin, halyqaralyq bedelin arttyrady degen senimimiz bar, - dedi Ulttyq bank basshysy.
Aıta keteıik, búgin Májilistiń jalpy otyrysynda «Keıbir zańnamalyq aktilerge Qazaqstannyń arnaýly memlekettik organdarynyń qyzmeti máseleleri boıynsha ózgerister men tolyqtyrýlar engizý týraly» zań jobasy men ilespe qujat birinshi oqylymda maquldandy.