HVQ bas ekonomısi Eýrazııanyń ekonomıkalyq damýyna boljam jasady

NUR-SULTAN. QazAqparat - Halyqaralyq valıýta qorynyń bas ekonomısi Morıs Obstfeld eýrazııalyq keńistiktegi ekonomıkalyq ahýalǵa qatysty boljam jasady, dep habarlaıdy QazAqparat tilshisi.

«Ortalyq Azııa ekonomıkasy Reseıge qarsy salynǵan sanktsııalarǵa baılanysty qıyndyqtarmen betpe-bet kelip otyr. Buǵan qosa, Qytaıda da turaqsyzdyq baıqalady. 2014 jyly qara altyn qunynyń ózgerýi munaı eksporttaýshylardy, onyń ishinde Qazaqstandy da tyǵyryqqa tiredi. Qazirgi ýaqytta munaı baǵasy qaıta qalpyna kelip qaldy. Eger Eýrazııa, Eýropa ekonomıkasy jaıynda aıtar bolsaq, sońǵy toqsanda belgili bir baıaýlaý baıqalady. Máselen, Germanııada ósimniń baıaýlaǵany baıqalyp otyr. Al Shyǵysqa - Qytaıǵa qaraı jolda quldyraý da, órleý de bar. Bir alańdaýshylyqtyń bary anyq. Ol taıaý toqsandaǵy ónimdilik ósimimen baılanysty», - dedi Morıs Obstfeld XII Astana ekonomıkalyq forýmy aıasynda.

Onyń atap ótýinshe, aldaǵy 6 aıdyń ishinde álemdik saýdada turaqsyzdyq saqtalatyn bolady.

«Árıne, saýda úshin ınvestıtsııa óte mańyzdy. Jahandyq ekonomıkadaǵy ózgerister tolyqtaı alǵanda baıaý ósimdi kórsetip otyr», - dedi ol.