HVQ Almaty ortalyǵynda qansha maman biliktiligin arttyrdy
ASTANA. KAZINFORM – Halyqaralyq valıýta qorynyń Almaty ortalyǵynda ortalyq memlekettik organdardyń 1 170 mamany biliktiligin arttyrdy. Bul týraly Májilistiń jalpy otyrysynda Ulttyq bank tóraǵasy Tımýr Súleımenov aıtty.
- Naqty derekterge súıensek, 5 jyldyń ishinde 1 170 maman oqýdan ótti. Onyń ishinde Ulttyq bankten – 476, Ulttyq statıstıka bıýrosynan – 118, Qrajy naryǵyn retteý jáne damytý agenttiginen – 109, Memlekettik kirister komıtetinen – 65, Qarjy mınıstrliginiń ortalyq apparatynan – 63, Ulttyq ekonomıka mınıstrliginen – 39 maman. Oqý baǵyttary - makroekonomıkalyq, aqsha-kredıt jáne fıskaldyq saıasat, bıýdjettik josparlaý, memlekettik qarjy men boryshty basqarý, qarjylyq retteý men qadaǵalaý, memlekettik qarjy tólem balansy jáne statıstıka, ortalyq bankterdiń tsıfrlyq valıýtalary, ıaǵnı, tsıfrlyq teńge, tsıfrlyq tólemder jáne fınteh, - dedi Ulttyq bank tóraǵasy.
Onyń aıtýynsha, Ulttyq bank Bıýdjet, Salyq kodeksterin, Bankter týraly zańdy qabyldamas buryn atalǵan ortalyqtyń mamandarmen aldyn ala aqyldasty.
- Osy zańdardy qabyldadyq. Endi qalaı júzege asyrylatynyn kóremiz, ıaǵnı odan keıin baǵalaýǵa múmkindik bolady, - dedi Tımýr Súleımenov.
Aıta keteıik, búgin Májilistiń jalpy otyrysynda «Qazaqstan Respýblıkasy men Halyqaralyq valıýta qory arasyndaǵy Kavkaz, Ortalyq Azııa jáne Mońǵolııa úshin áleýetti damytýdyń óńirlik ortalyǵyna qatysty ózara túsinistik jónindegi memorandýmdy ratıfıkatsııalaý týraly» Zań qabyldandy.
