HVQ: 2031 jylǵa qaraı Qazaqstandaǵy jan basyna shaqqandaǵy ІJÓ 23 myń dollarǵa jetýi múmkin
ASTANA. KAZINFORM - Qazaqstan jan basyna shaqqandaǵy ishki jalpy ónim kólemi boıynsha álemdik reıtıngtegi ornyn jaqsartýy múmkin. El 2031 jylǵa qaraı 71-orynnan 68-orynǵa kóteriledi degen boljam bar.
Mundaı málimet Halyqaralyq valıýta qory jarııalaǵan sáýir aıyndaǵy sholýda keltirilgen.
Qordyń baǵalaýynsha, 2026 jyly Qazaqstandaǵy jan basyna shaqqandaǵy ІJÓ kólemi 17,5 myń dollar bolady. Bul kórsetkish boıynsha el Seıshel araldary men Serbııanyń arasynda ornalasady.
Aımaqtaǵy memleketterdiń ishinde Reseı 18,53 myń dollarmen 69-orynda tur. Qytaı 14,87 myń dollarmen 78-orynǵa jaıǵasqan. Ózbekstan 4,66 myń dollar kórsetkishimen 131-orynda bolsa, Qyrǵyzstan 3,2 myń dollarmen 142-orynda tur.
HVQ boljamyna sáıkes, 2031 jylǵa qaraı Qazaqstandaǵy jan basyna shaqqandaǵy ІJÓ 23,17 myń dollarǵa deıin ósedi.
Osy kórsetkishpen Qazaqstan álemdik reıtıngte Oman men Túrkııanyń arasyna ornalasýy múmkin.
Boljam boıynsha, Ózbekstan 7,06 myń dollar kórsetkishimen 121-orynǵa kóteriledi. Qytaı 19,88 myń dollarmen 74-orynǵa jaqyndaıdy. Qyrǵyzstan 142-orynda qalady. Al Reseı 18,48 myń dollarmen 78-orynǵa tómendeýi yqtımal.
Álemdik reıtıngte kósh basynda Lıhtenshteın tur. Qazir onda jan basyna shaqqandaǵy ІJÓ kólemi 226,81 myń dollardy quraıdy. Bul Qazaqstan kórsetkishinen shamamen 13 ese joǵary.
Eń tómengi kórsetkish Iemen elinde tirkelgen. Munda bir adamǵa shaqqandaǵy ІJÓ kólemi 383,75 dollar ǵana.
HVQ deregine sáıkes, 2031 jyly da Lıhtenshteın reıtıngtegi birinshi ornyn saqtap qalady. Al Iemen sońǵy orynda qala beredi.
Qor boljamynsha, aldaǵy bes jylda Qazaqstandaǵy jan basyna shaqqandaǵy ІJÓ 32,4 paıyzǵa ósýi múmkin. Ósý qarqyny boıynsha respýblıka álemde 43-orynda tur.
Absolıýt kórsetkish boıynsha ár adamǵa shaqqandaǵy ósim 5,67 myń dollar bolady. Bul álem elderi arasyndaǵy 59-nátıje sanalady.
Buǵan deıin Halyqaralyq valıýta qory Almatyda óńirlik damý ortalyǵyn ashatyny habarlanǵan edi.
