«Hýtor» uıymdasqan qylmystyq toby joq - Álenov
ASTANA. KAZINFORM – «Hýtor» uıymdasqan qylmystyq toby joq. Bul týraly Qonaev qalasynda ótip jatqan brıfıngte Іshki ister mınıstriniń birinshi orynbasary Baýyrjan Álenov aıtty.
«Bizdiń esepte «Hýtor» uıymdasqan qylmystyq toby degen joq... Jalpy, Qazaqstanda qoldanystaǵy zań men tártip bar. Menińshe, Qazaqstanda turatyn barlyq azamat osy tártipti, zańdy ustanady. Elimizde uıymdasqan qylmystyq toptardy, UQT-men aınalysatyn tulǵalardy tirkeý degen joq», - dedi ol BAQ ókilderiniń saýalyna oraı.
Sonymen qatar mınıstrdiń birinshi orynbasary Talǵar aýdandyq polıtsııa basqarmasynyń qyzmetkerlerine qatysty usynys engiziletindigin aıtty.
«Qazirgi ýaqytta eń bastysy – qylmysty ashý. Eń basty mindetimiz – tártip pen zańdy qalpyna keltirý, úıdi órtegenderdi anyqtaý. Meniń negizgi mindetim – osy jumystardy quqyq aıasynda uıymdastyrý, órtti jasaǵan adamdardy anyqtaý, ózge tulǵalardy qaraý, tekserý, odan keıin mundaı jaıttyń nelikten oryn alǵanyn anyqtaý», - Baýyrjan Álenov.
Onyń atap ótýinshe, Talǵardaǵy qaıǵyly oqıǵaǵa baılanysty buzaqylyq, adam óltirý, qoqan-loqy jasaý, qylmysty habarlamaý týraly derekter boıynsha qylmystyq qozǵalǵan.
Eske salaıyq,4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
