Hýsıtterdiń drony Izraıldiń Eılat kýrortyndaǵy qonaqúıge tıdi
ASTANA. KAZINFORM – Iemennen ushyrylǵan hýsıtterdiń drony Izraıldiń Eılat kýrortyndaǵy qonaqúıge soqqy jasady, dep habarlaıdy The Times of Israel.
Oqıǵa beısenbi kúni tirkeldi. Ushqyshsyz ushaq qonaqúıdiń kireberis bóligine soǵylyp, ǵımaratqa zaqym keltirdi. Zardap shekkender joq. Jarylystan keıin órt shyqqan, ol qutqarý qyzmeti kúshimen sóndirildi. Polıtsııa aýmaqty qorshap, jarylǵysh zattar jónindegi mamandar jumys istep jatyr.
Izraıl Qorǵanys armııasy áýe kúshteri dronnyń nelikten áýede atyp túsirilmegenin anyqtaý úshin tergeý júrgizip jatqanyn málimdedi.
Osydan keıin Izraıl áskerı kúshteri Iemennen jiberilgen taǵy eki drondy atyp túsirgenin habarlady.
Keshke qaraı hýsıtter Izraıldiń ortalyq aýdandaryna ballıstıkalyq raketa ushyrdy. Áýe shabýylyna qarsy qorǵanys júıesi ony atyp túsirgenimen, el boıynsha, sonyń ishinde Tel-Avıv, Ierýsalım, Haıfa, Petah-Tıkva, Rıshon-le-Tsıon, Modıın, Beıt-Shemesh qalalarynda áýe dabyly qosylyp, mıllıondaǵan turǵyndar baspanaǵa jasyryndy.
Hýsıtter shabýyldyń jaýapkershilikti óz moınyna alyp, Tel-Avıvtegi «áskerı nysanaǵa» raketa baǵyttaǵanyn jáne birneshe drondy Eılat pen Beer-Shevaǵa jibergenin málimdedi.
Izraıldik áskerılerdiń aqparatyna sáıkes, olardyń bir bóligi el aýmaǵyna jetpegen.
Sońǵy aptalarda Eılatqa hýsıtterdiń shabýyldary jıilep ketken. Buǵan deıin dron Ramon áýejaıyna soqqy berip, ınfraqurylymǵa zııan keltirgen, bir adam jeńil jaraqat alǵan.
18 naýryzdan beri, Izraıl Gaza sektorynda HAMAS-qa qarsy shabýylyn qaıta bastaǵan sátten bastap Iemennen 87 ballıstıkalyq raketa men keminde 40 dron ushyrylǵan.
Izraıl buǵan jaýap retinde Iemendegi nysandarǵa áýe soqqylaryn jasap keledi. Sońǵy shabýyl seısenbi kúni Hodeıda porty mańyndaǵy ınfraqurylymǵa baǵyttalǵan. Tamyz aıynda Izraıl Sanada hýsıtter úkimetiniń premer-mınıstri men birneshe mınıstrin joıǵan soqqy jasaǵan bolatyn. Ol kezde Tel-Avıv bul «kampanııanyń basy ǵana» dep eskertken.
❗️𝐖𝐀𝐓𝐂𝐇: A hotel in Eilat, southern Israel, hit by a Houthi UAV drone
— Israel Defense Forces (@IDF) September 18, 2025
Launched at vacationers, this attack is 𝐨𝐧𝐞 𝐨𝐟 𝐡𝐮𝐧𝐝𝐫𝐞𝐝𝐬 that the Houthi terror regime has carried out against our civilians. This is what we’re operating against. pic.twitter.com/NySwXJvOYu