Hýsıtter Iemen úkimetimen tutqyndardy almasýǵa daıyn
ASTANA. KAZINFORM – Iran qoldaıtyn «Ansarýllah» qozǵalysy (hýsıtter) Iemen úkimetimen tutqyn almasý týraly jan-jaqty kelisim jasaýǵa daıyn ekenin jarııalady. Bul týraly Anadoly habarlady.
Hýsıtter qozǵalysynyń tutqyndar komıtetiniń basshysy Abdýlkader ál-Mýrtaza ALTHAWRAH qozǵalysynyń saıtynda olardyń tarapy eshqandaı shartsyz dıalogqa daıyn ekenin aıtty.
– Biz BUU qamqorlyǵymen buryn qol qoıylǵan barlyq kelisimderdi oryndaýǵa, sondaı-aq eki jaqtyń barlyq tutqyndaryn qamtıtyn jan-jaqty kelisimdi jasaýǵa daıynbyz, – dedi ál-Mýrtaza.
Ol sondaı-aq jergilikti sheıhter men qoǵamnyń qurmetti múshelerin protsesti jeńildetý úshin bul máselede arasha bolýǵa shaqyrdy.
Buǵan deıin Iemen úkimettik kúshteri men hýsıtter arasynda ártúrli maıdandarda birneshe ret tutqyn almasý bolǵan.
Alaıda eki jaqtan ustalǵan tutqyndardyń naqty sany áli belgisiz.