Hýsıtter Iemen úkimeti kúshteriniń áskerı lagerlerine soqqy jasady
ASTANA. KAZINFORM — Iemende úkimetke jaqyn áskerı kúshterge hýsıtter shabýyl jasap, saldarynan kóp adam qaza tapty. Bul týraly Anadolu agenttigi habarlady.
«Iemenniń jedel áreket etý kúshteri» áleýmettik jelidegi X paraqshasynda hýsıtter birneshe áskerı lagerge, sonyń ishinde ózderine tıesili nysandarǵa jáne qarýly kúshterdiń bólimshelerine soqqy jasaǵanyn málimdedi.
Shabýyl saldarynan adam qaza taýyp, materıaldyq zalal kelgen. Alaıda qaza tapqandar men jaralanǵandardyń naqty sany ázirshe jarııalanǵan joq.
Basylymnyń málimetinshe, hýsıtterdiń shabýyly Iemen qarýly kúshteri Qorǵanys mınıstrliginiń tapsyrmasymen birqatar qaýipsizdik jáne áskerı operatsııa ótkizgennen keıin jasalǵan. Bul operatsııalar óńirlerdegi qaýipsizdikti qamtamasyz etý, halyqaralyq avtojoldardy qorǵaý, kontrabanda men jol tonaýǵa qatysy bar qarýly toptarǵa qarsy kúresý, sondaı-aq izdeýde júrgen adamdardy ustaý maqsatynda júrgizilgen.
Eske salaıyq, buǵan deıin Iemendegi «Ansar Alla» (hýsıtter) qozǵalysy Qyzyl teńiz jaǵalaýyndaǵy Saýd Arabııasynyń strategııalyq mańyzy bar eki munaı nysanyna zymyrandar men ushqyshsyz ushý apparattary arqyly soqqy jasaǵanyn habarlaǵan edik.
