Hýsıtter Saýd Arabııasynyń Iemenge 28 ret áýe soqqysyn jasaǵanyn málimdedi
ASTANA. KAZINFORM — Iemendegi jaǵdaı shıelenise túsip, maıdannyń birneshe baǵytynda qarýly qaqtyǵystar jalǵasyp jatyr, dep habarlaıdy Kazinform agenttiginiń menshikti tilshisi.
Iemendik hýsıtterdiń «Ansar Allah» qozǵalysy sońǵy táýlikte Saýd Arabııasy áskerı-áýe kúshteriniń eldiń úsh provıntsııasyna 28 ret soqqy jasaǵanyn málimdedi. Bul týraly hýsıtterdiń áskerı ókili ıAhıa Sarı málimdeme jasady.
شن الطيران الحربي السعودي خلال الـ24 ساعة الماضية 28 غارة جوية من خلال طائرات "F15" و "تايفون" أقلعت من قاعدتي خميس مشيط والطائف استهدفت محافظات تعز والجوف ومأرب ليبلغ إجمالي الغارات منذ بدء التصعيد السعودي على بلدِنا وشعبنا 760 غارة جوية.
— العميد.يحيى سريع (@Yah_Saree) September 20, 2026
Onyń aıtýynsha, Saýd Arabııasyndaǵy Hamıs-Mýshaıt pen Taıf áskerı áýe bazalarynan ushqan F-15 jáne Eurofighter Typhoon joıǵysh ushaqtary Iemenniń Taız, Marıb jáne ál-Djaýf provıntsııalaryndaǵy nysandarǵa soqqy jasaǵan.
ıAhıa Sarı sońǵy shıelenis órshigeli beri Iemenge jasalǵan áýe soqqylarynyń sany 760-qa jetkenin málimdedi. Saýd Arabııasy bul aqparatqa ázirge túsinikteme bergen joq.
Hýsıtterdiń baqylaýyndaǵy «Al-Masıra» telearnasynyń habarlaýynsha, áýe soqqylarynyń biri ál-Djaýf provıntsııasyndaǵy telekommýnıkatsııa munarasyna tıgen. Sonymen qatar Iemenniń soltústigindegi Saada provıntsııasynyń shekaraǵa jaqyn aýdandaryna artıllerııalyq qarýdan oq atylǵan.
Áýe soqqylarymen qatar, hýsıtter men Iemenniń halyqaralyq deńgeıde moıyndalǵan úkimetine qarasty kúshter arasynda qarýly qaqtyǵystar da jalǵasyp jatyr. Eń aýyr shaıqastar Taız provıntsııasynyń batysynda jáne Bab-el-Mandeb buǵazyna qaraı sozylatyn taýly óńirlerde boldy.
Taızdiń batysyndaǵy birneshe pozıtsııa hýsıtterdiń qaıta baqylaýyna ótkeni habarlandy. Alaıda bul ózgerister maıdan shebindegi jalpy jaǵdaıǵa aıtarlyqtaı áser etken joq. Sońǵy kúnderi jekelegen pozıtsııalar eki taraptyń baqylaýyna kezek-kezek aýysyp otyrǵan.
Buǵan deıin hýsıtter Iemenniń ońtústik-batys jaǵalaýynda aıtarlyqtaı aýmaqtyq jetistikterge jetken bolatyn. Olar 10 qyrkúıekte Moha port qalasyn basyp alyp, kelesi kúni Zýbab aýdany men Bab-el-Mandeb buǵazyndaǵy Maııýn aralyn baqylaýǵa aldy.
Al Iemen úkimetiniń kúshteri strategııalyq mańyzy bar teńiz jolyna jaqyn taýly óńirlerde hýsıtterdiń jańa aýmaqtardy basyp alýyna tosqaýyl qoıýǵa umtylyp jatyr.
Qaqtyǵys bastalǵanǵa deıin álemdik saýda aınalymynyń shamamen 12 paıyzy Bab-el-Mandeb buǵazy arqyly júzege asqan.
Buǵan deıin AQSh Taıaý Shyǵystaǵy jaǵdaıdyń ýshyǵýy múmkin ekenin eskertken.
Al Tegeran Vashıngton Iranǵa qaıtadan shabýyl jasaý týraly sheshim qabyldaǵanyn málimdedi.
Sonymen qatar Saýd Arabııasy Mekke mańynda hýsıtterdiń dronyn qaǵyp túsirgenin habarlaǵan bolatynbyz.
Aqzat Jıenalına
