Hýsıtter Saýd Arabııasyndaǵy eki áýejaıǵa shabýyl jasaǵanyn málimdedi
ASTANA. KAZINFORM — Iemendik hýsıtter Saýd Arabııasyndaǵy Dammam jáne Djızan áýejaılaryna ushqyshsyz ushý apparattarymen shabýyl jasaǵanyn, sondaı-aq erte eskertý radary men áskerı-kólik ushaǵyna soqqy bergenin málimdedi. Bul týraly TASS habarlady.
Mundaı málimdemeni hýsıtter qozǵalysynyń áskerı ókili ıAhıa Sarıa jasady.
— Keıingi 48 saǵat ishinde kúshterimiz Dammam áýejaıyna eki kezeńmen eki ushqyshsyz apparattyń kómegimen shabýyl jasady, — dep jazdy Sarıa Telegram-arnasynda.
Onyń aıtýynsha, hýsıtter Djızandaǵy erte eskertý radaryna jáne sol qaladaǵy áýejaıda turǵan áskerı-kólik ushaǵyna da soqqy bergen.
Iemende 2014 jyldyń tamyzynan beri hýsıtter men Saýd Arabııasy qoldaıtyn úkimettik kúshter arasynda qarýly qaqtyǵys jalǵasyp keledi.
2026 jyldyń shildesinde kóterilisshiler Saýd Arabııasyna qarsy teńiz blokadasyn engizetinin jarııalady. Osydan keıin koroldikke tıesili birneshe munaı tankerine shabýyl jasady.
Tamyz aıynyń basynda «Ansar Allah» qozǵalysy Iemenniń ońtústik-batysynda shabýylǵa kóshti. Al 10-11 qyrkúıekte Moha portty qalasy men Bab-el-Mandeb buǵazy mańyndaǵy aýmaqtardy baqylaýyna aldy.
4 qazanda Iemen úkimetiniń kúshteri kóterilisshiler baqylaýyndaǵy aýmaqtardy qaıtarý úshin aýqymdy áskerı operatsııa bastalǵanyn málimdedi.
Eske salaıyq, buǵan deıin Saýd Arabııasy bastaǵan koalıtsııa Iemendegi hýsıtterdiń áskerı áleýetin nyǵaıtýǵa paıdalanylatyn mańyzdy resýrstardy joıý maqsatynda áskerı operatsııa ótkizgenin jazǵan edik. Ásirese, ballıstıkalyq zymyrandar men ushqyshsyz ushý apparattarynyń múmkindikterin qoldaıtyn nysandarǵa basymdyq berilgen.
