Hýsıtter Saýd Arabııasyndaǵy áýe bazasyna shabýyl jasaǵanyn málimdedi
ASTANA. KAZINFORM — Iemendegi aýqymdy áskerı qımyldardyń qaıta bastalýy kórshiles memleketter men Qyzyl teńizdegi keme qatynasynyń qaýipsizdigine tónetin qaterdiń kúsheıýimen qatar júrip jatyr, dep habarlaıdy Kazinform agenttiginiń menshikti tilshisi.
Iemendik hýsıtter dúısenbi kúni Saýd Arabııasynyń ońtústik-batysyndaǵy Hamıs-Mýshaıt qalasynda ornalasqan Korol Halıd atyndaǵy áskerı áýe bazasyna jappaı soqqy jasaǵanyn málimdedi. Bul málimdemeni «Ansar Alla» qozǵalysynyń baqylaýyndaǵy SABA agenttigi taratty.
Hýsıtterdiń áskerı ókili ıAhıa Sarı shabýylǵa ondaǵan ballıstıkalyq zymyran men ushqyshsyz ushý apparaty qatysqanyn aıtty. Nysanaǵa avıatsııalyq angarlar, radıolokatsııalyq júıeler, ushý-qoný jolaqtary jáne oq-dári qoımalary alynǵan.
Hýsıtter áýe bazasyna tikeleı soqqy jasalyp, aıtarlyqtaı zalal keltirilgenin málimdedi. Saýd Arabııasy ázirge bul aqparatty rastaǵan joq.
Qozǵalys bul operatsııany sońǵy bes kúnde Saýd Arabııasy áskerı-áýe kúshteriniń Iemen aýmaǵyna jasaǵan 300-den astam áýe soqqysyna jaýap dep atady.
Hýsıtterdiń málimdeýinshe, bul shabýyldarǵa Hamıs-Mýshaıt pen Taıf qalalaryndaǵy áskerı áýe bazalarynan ushyp shyqqan F-15 jáne «Taıfýn» joıǵysh ushaqtary qatysqan.
— Kez kelgen jańa basqynshylyqqa budan da aýqymdy ári qarqyndy operatsııalarmen jaýap beriledi, — delingen hýsıtterdiń málimdemesinde.
Saýd Arabııasynyń Azamattyq qorǵanys qyzmeti Hamıs-Mýshaıt aımaǵynda qaýip tóngeni týraly eskertý jarııalady. Alaıda keıin qaýiptiń seıilgenin habarlady. Turǵyndarǵa tótenshe jaǵdaılar qyzmetiniń nusqaýlaryn oryndaý, kóshelerde jınalmaý jáne bolyp jatqan oqıǵalardy túsirmeý tapsyryldy.
Alert: The danger has passed in Khamis Mushait Governorate. For your safety, continue following #CivilDefense instructions and avoid gathering and filming. In case of emergency, call (998). https://t.co/HjzIjsyCMC
— الدفاع المدني السعودي (@SaudiDCD) September 14, 2026
Saýd Arabııasy bıliginiń málimetinshe, ótken aptada eldiń ońtústigine jasalǵan zymyrandyq jáne ushqyshsyz ushý apparattary shabýylynan 73 beıbit turǵyn zardap shekken. Shabýyldar órtke jáne energetıkalyq nysandar jumysynyń ýaqytsha úzilýine de sebep bolǵan.
Shıelenistiń kúsheıýi Iemenniń batysyndaǵy áskerı qımyldardyń jandanýymen tuspa-tus kelip otyr. Saýd Arabııasy qoldaıtyn úkimettik kúshter Taız provıntsııasyndaǵy birqatar pozıtsııany qaıtaryp alǵanyn jáne áýe kúshteriniń qoldaýymen ilgerileýin jalǵastyryp jatqanyn habarlady.
Yemen’s Houthis say Saudi Arabia launched more than 50 strikes against their positions in 24 hours. Fighting between the Iran-backed group and Saudi-backed government forces renewed in July when the Houthis declared a maritime blockade on Saudi Arabia and began targeting its ships in the Red Sea https://t.co/cMLZEmBk6E
— AFP News Agency (@AFP) September 14, 2026
Sonymen qatar hýsıtter strategııalyq mańyzy zor Bab ál-Mandeb buǵazy mańyndaǵy qatysýyn keńeıtip jatyr. AP agenttiginiń habarlaýynsha, hýsıtter buǵazdan shamamen 160 shaqyrym soltústikte ornalasqan Úlken Hanısh jáne Kishi Hanısh araldaryn baqylaýyna alǵan. Buǵan deıin hýsıtter Qyzyl teńizge kireberistegi Perım aralyn basyp alǵan.
Bab ál-Mandeb buǵazy Qyzyl teńizdi Aden shyǵanaǵymen baılanystyrady jáne álemdik saýda men energııa tasymalynyń negizgi baǵyttarynyń biri sanalady.
Halyqaralyq kóshi-qon uıymynyń sońǵy málimetteri boıynsha, Iemendegi áskerı qımyldardyń shıelenisýine baılanysty 85 myńnan astam adam úılerin tastap ketken. Eldiń taǵy 2 myńnan astam turǵyny Djıbýtıge qashqan.
Hýsıtter 2014 jyldan beri Iemen astanasy Sana men eldiń soltústiginiń edáýir bóligin baqylaýda ustap otyr. Olarǵa qarsy kúshterdi Saýd Arabııasy bastaǵan arab koalıtsııasy qoldaıdy.
Ótken aptada Iemen úkimetiniń kúshteri hýsıtterge qarsy shabýylyn bastady.
Aıta ketelik Iemendegi qaqtyǵys: 46 myń adam úıin tastap ketýge májbúr boldy.
