Hýsıtter Saýd Arabııasyndaǵy áskerı bazaǵa shabýyl jasaǵanyn málimdedi
ASTANA. KAZINFORM — Iran qoldaıtyn hýsıtter Saýd Arabııasynyń ońtústigindegi Sharýra qalasynda ornalasqan áskerı bazaǵa ballıstıkalyq zymyrandar men ushqyshsyz ushý apparattary arqyly shabýyl jasaǵanyn málimdedi, dep habarlaıdy Anadolu.
Basylymnyń málimetinshe, hýsıtterdiń áskerı ókili ıAhıa Sarı áleýmettik jelidegi X paraqshasynda jarııalaǵan málimdemesinde shabýyldyń nysanasy Iemen shekarasyna jaqyn ornalasqan Sharýra qalasyndaǵy áskerı baza bolǵanyn aıtty. Hýsıtterdiń málimdeýinshe, bul baza olarǵa qarsy soqqy jasaý úshin paıdalanylǵan.
Sarı Sharýradaǵy bazadaǵy qarý-jaraq qoımalaryna, sondaı-aq komandalyq jáne basqarý ortalyǵyna kóp mólsherde ballıstıkalyq zymyran men dron arqyly shabýyl jasalǵanyn málimdedi.
Hýsıtterdiń áskerı ókili Saýd Arabııasyna baǵyttalǵan shabýyldardy el aýmaǵynyń ishki bóligine qaraı «keńeıtip, kúsheıtetinin» eskertti.
Saýd Arabııasy bastaǵan arab koalıtsııasynyń Iemendegi hýsıtterge qarsy áskerı operatsııalaryna jaýap retinde top Saýd Arabııasynyń shekara mańyndaǵy aýdandary men ońtústik provıntsııalaryna turaqty túrde soqqy jasap keledi.
Aımaqtaǵy áskerı jáne strategııalyq mańyzy bar nysandar Iemen aýmaǵynan ushyrylatyn drondar men ballıstıkalyq zymyrandardyń shabýylyna oqtyn-oqtyn ushyraıdy.
Buǵan deıin hýsıtterdiń munaı men júk tasymalynyń mańyzdy baǵytyndaǵy araldy basyp alǵany habarlanǵan.
Sondaı-aq Saýd Arabııasy bastaǵan koalıtsııa kúshteri Iemendegi hýsıtterdiń Saýd Arabııasynyń ońtústigindegi Hamıs-Mýshaıt, Abha jáne Djazan qalalaryna ballıstıkalyq zymyrandar men ushqyshsyz ushý apparattary arqyly soqqy jasaǵanyn málimdegen bolatyn.
