Hýsıtter Er-Rııad áýejaıyna taǵy da zymyranmen shabýyl jasaǵanyn málimdedi
ASTANA. KAZINFORM – Iemendegi hýsıtter qozǵalysy Saýd Arabııasynyń astanasy Er-Rııadtaǵy Korol Halıd atyndaǵy halyqaralyq áýejaıǵa ballıstıkalyq zymyran ushyrǵanyn málimdedi, dep habarlaıdy Sınhýa.
Hýsıtter 12 qazanda jasaǵan málimdemesinde Saýd Arabııasynyń ońtústik-batysyndaǵy áskerı áýe bazalarynyń birine de ushqyshsyz ushý apparatymen soqqy bergenin habarlady.
– Korol Halıd atyndaǵy halyqaralyq áýejaıǵa ballıstıkalyq zymyran ushyryldy. Sonymen qatar Saýd Arabııasynyń ońtústik-batysyndaǵy áýe bazasyna ushqyshsyz ushý apparaty arqyly shabýyl jasaldy, – delingen hýsıtterdiń málimdemesinde.
Ázirge shabýyldardyń saldary, zardap shekkender men keltirilgen shyǵyn týraly aqparat jarııalanǵan joq.
Saýd Arabııasy bıliginiń bul málimdemege qatysty resmı túsiniktemesi de ázirge belgisiz.
Aıta keteıik, buǵan deıin 11 qazanda hýsıtter Saýd Arabııasynyń áýejaılaryna taǵy da shabýyl jasaıtynyn eskertken bolatyn. Qozǵalystyń áskerı ókili ıAhıa Sarı áýe kompanııalary men jolaýshylardy eldiń áýejaılaryn paıdalanbaýǵa shaqyrǵan.
