Hýsıtter álemdik saýdanyń eleýli bóligi ótetin buǵazǵa qaraı jyljyp keledi
ASTANA. KAZINFORM – Iemendegi hýsıtter 10 qyrkúıek, beısenbi kúni Qyzyl teńizdegi strategııalyq portty Moha qalasyna baqylaý ornatyp, Bab-el-Mandeb buǵazyna qaraı jyljyp keledi, dep habarlaıdy Euronews.
Euronews Iemendegi áskerı derekkózge silteme jasap habarlaǵandaı, hýsıtter kúshteri buǵan deıin eldiń halyqaralyq deńgeıde moıyndalǵan úkimetiniń baqylaýynda bolǵan Moha qalasyna kirgen.
Basylymnyń málimetinshe, tamyz aıynyń basynan beri qalaǵa qarqyndy shabýyl jasalǵan. Birneshe kún ishinde qalaǵa 25-ten astam zymyran ushyrylyp, sonyń saldarynan porttyń jumysy toqtatylǵan. Alaıda Iemen bıligi ázirge Mohanyń hýsıtterdiń baqylaýyna ótkenin resmı túrde rastaǵan joq.
Euronews áskerı derekkózge silteme jasap, hýsıtterdiń Qyzyl teńizdiń ońtústik bóligindegi Zýkar aralyn zymyran soqqylary men katerler qoldanylǵan jerústi operatsııasy nátıjesinde basyp alǵanyn da habarlady.
Basylym derekkózderiniń málimetinshe, hýsıtterdiń kelesi nysanalary jaǵalaýdaǵy Dhýbab qalasy men Perım araly bolýy múmkin. Euronews sonymen qatar Bab-el-Mandeb buǵazy mańynda ornalasqan Perım aralyna hýsıt jasaqtarynyń túskeni týraly rastalmaǵan aqparat taraǵanyn atap ótti.
Qozǵalys Qyzyl teńiz ben Sýets kanaly arqyly Azııa men Eýropany baılanystyratyn teńiz dálizine baqylaýyn kúsheıtýdi kózdeıdi. Jarııalanymda Bab-el-Mandeb buǵazy Ormýz buǵazymen qatar álemdik saýda men munaı tasymaly úshin asa mańyzdy ekeni aıtylǵan.
Iemen bıligi buǵan deıin hýsıtterdiń jaǵalaýdyń osy bóligin baqylaýǵa alýǵa áreket jasaýy múmkin ekenin birneshe ret eskertken.
Euronews Iemen Ulttyq qarsylyq kúshteriniń ókili Sadek Dýaıdtyń sózin keltiredi. Ol buǵan deıin Mohaǵa jasalǵan shabýyldar Bab-el-Mandeb aımaǵynda tirek bazasyn qurý strategııasynyń bir bóligi bolýy múmkin ekenin málimdegen.
Shabýyl aıasynda áskerı qaqtyǵystar da shıelenisip keledi. Hýsıtter ótken aptada Saýd Arabııasy qoldaıtyn úkimettik kúshterge qarsy aýqymdy shabýyl bastady.
Basylymnyń málimetinshe, hýsıtter Saýd Arabııasynyń aýmaǵyna da soqqy jasaǵan. Buǵan jaýap retinde Er-Rııad qozǵalys baqylaýyndaǵy aýdandarǵa shabýyldaryn kúsheıtti.
Buǵan deıin Saýd Arabııasy bastaǵan koalıtsııa kúshteri Iemendegi hýsıtterdiń Saýd Arabııasynyń ońtústigindegi Hamıs-Mýshaıt, Abha jáne Jızan qalalaryna ballıstıkalyq zymyrandar men ushqyshsyz ushý apparattary arqyly soqqy jasaǵanyn habarlaǵan.
Aıta ketelik Iemen úkimetiniń áskeri hýsıtterge qarsy shabýyl bastaǵany týraly jazǵan edik.
