Hýsıtter AQSh-tyń áýe tasymaldaýshy kemesine tórtinshi ret shabýyl jasady

ASTANA. KAZINFORM –  Iemendik toptyń ókili Izraıldiń shabýyldary men Gaza sektoryndaǵy blokada toqtaǵanǵa deıin soqqylardy kúsheıtetinin málimdedi, dep habarlaıdy Kazinform tilshisi. 

Хуситтер АҚШ-тың әуе тасымалдаушы кемесіне төртінші рет шабуыл жасады
Фото: x.com / @army21ye

Sársenbi kúni ıemendik hýsıtter Qyzyl teńizde AQSh-tyń áýe tasymaldaýshy kemesine shabýyl jasaǵanyn málimdedi. Bul – 72 saǵat ishinde AQSh áskerı kemelerine jasalǵan tórtinshi soqqy.

Hýsıtterdiń ókili ıAhıa Sarı operatsııaǵa AQSh-tyń áýe tasymaldaýshy tobyna baǵyttalǵan «birneshe qanatty zymyran men dron» jumyldyrylǵanyn aıtty. Onyń sózinshe, bul AQSh-tyń Iemenge josparlaǵan shabýylyn boldyrmaýǵa kómektesken.

— Bul operatsııa óz maqsatyna sátti jetti, — dedi Sarı áleýmettik jelilerde jarııalanǵan málimdemesinde.

Sondaı-aq, ol «AQSh agressııasy» Iemenniń palestın halqyna «berik» qoldaý kórsetýine kedergi bolmaıtynyn jáne Izraılge shabýyldar Izraıl kúshteri Gaza sektoryna jasaǵan soqqylaryn toqtatqansha kúsheıe túsetinin aıtty.

Qazirgi ýaqytta AQSh áskerı ókilderi bul málimdemege qatysty túsinikteme bergen joq.

AQSh Qarýly kúshteriniń Ortalyq qolbasshylyǵy sársenbi kúni Iemenge jasalǵan shabýyldardyń jalǵasyp jatqanyn rastady. X áleýmettik jelisinde jarııalanǵan habarlamada AQSh «Iran qoldaıtyn hýsıt-lańkesterine qarsy úzdiksiz operatsııalar júrgizip jatqany» aıtylǵan.

Iemendik BAQ AQSh-tyń sońǵy saǵattarda eldiń birneshe aımaǵyna, sonyń ishinde Saada men porttyq Hodeıda qalasyna soqqy jasaǵanyn habarlady.

15 naýryzda AQSh prezıdenti Donald Tramp AQSh armııasyna ıemendik hýsıtterge qarsy áreket bastaýdy tapsyrǵannan keıin, Iemenge birqatar áýe soqqysy jasaldy. Nátıjesinde 53 adam qaza taýyp, 98 adam jaralandy.

Seısenbi kúni hýsıtter Izraılge qaraı zymyran atty. Bul 19 qańtardan beri alǵash ret boldy, sol kezde HAMAS pen Izraıl kúshteri arasynda atysty toqtatý týraly kelisim jasalǵan edi.

Hýsıtterdiń zymyrany Izraıldiń Gaza sektoryna kútpegen shabýylynan birneshe saǵat ótken soń ushyryldy. Bul shabýyl kezinde atysty toqtatý buzylyp, 400-den astam palestındik qaza tapqan.

Izraıl hýsıtterdiń zymyranyn el aýmaǵyna jetpeı turyp atyp túsirgenin málimdedi. Al ıAhıa Sarı kóp uzamaı hýsıtterdiń Negev shólindegi Nevatım ızraıldik avıabazasyna «Palestına-2» ballıstıkalyq zymyranymen soqqy jasaǵanyn aıtty. Sondaı-aq, ol Izraıl Gaza sektoryna áýe shabýyldaryn toqtatpasa, aldaǵy saǵattar men kúnderi shabýyldaryn keńeıtetinin eskertti.

Сейчас читают