Hýsıtter AQSh-qa jedel ári joıqyn soqqy jasaıtynyn eskertti
ASTANA. KAZINFORM — Prezıdent Donald Tramp Saýd Arabııasynyń hýsıtterge qarsy áskerı operatsııasyna qosylǵan jaǵdaıda, kóterilisshiler AQSh-tyń Taıaý Shyǵystaǵy múddelerine jedel ári joıqyn soqqy beretinin málimdedi. Bul týraly FOX News-ke silteme jasaǵan Kazinform agenttiginiń Vashıngtondaǵy menshikti tilshisi habarlaıdy.
– Eger AQSh Iemenge qarsy áskerı áreketterge aralassa, jaýap qaıtarýdy uzaq kúttirmeımiz. AQSh-tyń ózine jáne aımaqtaǵy barlyq múddesine baǵyttalǵan jedel ári joıqyn soqqy jasaımyz, – dedi hýsıtterdiń saıası bıýrosynyń múshesi Muhammed ál-Býhaıtı.
Muhammed ál-Býhaıtı Saýd Arabııasyndaǵy munaı nysandary men áýejaı qyzmetkerlerin bul oryndardan alys júrýge shaqyrdy. Onyń aıtýynsha, atalǵan nysandar endi zańdy nysanaǵa aınalǵan.
Bul málimdemeler toptyń Er-Rııadtaǵy Korol Halıd atyndaǵy halyqaralyq áýejaıǵa jasaǵan joıqyn shabýylynan keıin aıtyldy. Qaıǵyly oqıǵa 13 adamnyń ómirin qıyp, júzdegen adamdy jaralady.
Dúısenbi kúni prezıdent Donald Tramp Er-Rııadtaǵy shabýyldy aıyptap, bul áreketti múlde orynsyz dep málimdedi.
– Hýsıtter óte óreskel qatelik jasap otyr. Olardyń isi múlde durys emes, – dedi AQSh prezıdenti Donald Tramp.
Buǵan deıin Iran AQSh-tyń Parsy shyǵanaǵyndaǵy derek ortalyqtaryn joıamyz dep ses kórsetkeni habarlanǵan bolatyn.
