Hýsanovtyń transferlik quny kóterildi

TAShKENT. KAZINFORM - «Transfermarkt» portaly APL oıynshylarynyń transfer baǵasyn jańartty. Oǵan sáıkes, ózbekstandyq legıoner Abdýqodır Hýsanov 35 mıllıon eýroǵa baǵalanǵan. Qorǵaýshynyń baǵasy birden 23 mıllıon eýroǵa kóterildi, dep habarlaıdy ÓzA.

Nátıjesinde ózbekstandyq fýtbolshy aǵylshyn premer-lıgasynyń eń qymbat oıynshylary tiziminde tórtinshi orynǵa turaqtady. Bul kestede baǵasy 100 mıllıon eýrony quraıtyn Aleksandr Isak kósh bastady. Odan keıin 55 mıllıon eýromen Itan Nvanerı («Arsenal») tur.

Aıta keteıik, Isak pen Nvanerıdiń jańartylǵan baǵasy burynǵydan 25 mıllıon eýroǵa joǵary. Sondaı-aq Dın Heısen («Bornmýt») APL-daǵy eń qymbat oıynshylar arasynda úshinshi orynda. Onyń «Transfermarkt» portalyndaǵy quny 42 mıllıon eýro.

Abdýqodır Hýsanovtyń jańartylǵan transferlik qunyna qatysty taǵy bir statıstıkany usynamyz. Naqtyraq aıtsaq, fýtbolshynyń baǵasy kóterilgennen keıin Azııanyń jetekshi birneshe quramasy – Qatar (23,13 mıllıon eýro), Aýstralııa (23,75 mıllıon), BAÁ (30,65 mıllıon) jáne Saýd Arabııasy (30,65 mıllıon) basqa 9 eldiń quramasyn artta qaldyrdy.

Abdýqodır Hýsanov qazir Azııadaǵy eń qymbat ekinshi ortalyq qorǵaýshy atandy. Ol «Bavarııa» komandasynyń koreıalyq oıynshysy Kım Mın Jaedan (45 mıllıon eýro) ǵana artta qaldy. Sonymen qatar A.Hýsanov sary qurlyqtyń eń qymbat oıynshylary arasynda tórtinshi orynǵa ıe boldy.

Sondaı-aq A.Hýsanovtyń jańartylǵan transferlik qunynan keıin Ózbekstan quramasynyń jalpy quny 70 mıllıon eýroǵa jetti. Nátıjesinde, ulttyq qurama qurlyqtaǵy eń qymbat úshinshi qurama atandy.

Abdýqodır Hýsanovtyń «Transfermarkt» portalyndaǵy burynǵy quny 12 mıllıon eýro bolǵan edi. Fýtbolshy qazir Ózbekstan quramasymen Qyrǵyz Respýblıkasy (20 naýryz) jáne Iran (25 naýryz) quramalaryna qarsy matchtarǵa daıyndalyp jatyr.

Eske sala keteıik, ózbekstandyq fýtbolshy Hýsanovtyń Anglııada qansha jalaqy alatyny belgili boldy.