Hýrgada jaǵalaýynda batıskaf apatqa ushyrap, tórt reseılik mert boldy
ASTANA. KAZINFORM - Hýrgada jaǵalaýyndaǵy sýǵa batqan batıskaf apatynan kem degende tórt reseılik týrıst qaza tapty. Jolaýshylardyń kópshiligi qutqaryldy, olardyń ómirine qaýip tónip turǵan joq, dep habarlady TASS agenttigine Reseıdiń Hýrgadadaǵy bas konsýly Vıktor Voropaev.

-Týrısterdiń kópshiligi qutqaryldy, olardyń ómirine qazir qaýip tónip turǵan joq. Biraq, ókinishke oraı, tórt adam qaza tapty, - dedi ol.
Mysyrdyń Al Youm as-Sabia aqparat portalynyń habarlaýynsha, apattan alty adam qaza taýyp, taǵy toǵyz adam jaraqat alǵan. Reseı bas konsýldyǵy bul aqparatqa qatysty ázirge túsinik bergen joq. Jergilikti bılik oqıǵaǵa qatysty tergeýdi bastady.
Reseı bas konsýldyǵy apat jaǵadan 1 shaqyrym jerde saǵat 10:00-de (Máskeý ýaqytymen 11:00) bolǵanyn aıtty. Bortta balalardy qosqanda barlyǵy 45 reseılik týrıst bolǵan.
Birneshe adamnyń taǵdyry qalaı bolary belgisiz. Qazirdiń ózinde oqıǵa ornynda Reseı dıplomatııalyq mıssııasynyń qyzmetkerleri júr.
Aldyn ala málimet boıynsha, oqıǵa Hýrgada jaǵalaýyndaǵy marjan rıfin tekserýdi qamtıtyn kezekti ekskýrsııa kezinde bolǵan.
Osyǵan deıin Mysyrda týrıster mingen Sea Story ıahtasy sýǵa batyp ketkeni týraly jazdyq.