HUNAN TV bas dırektory: Biz Dımashtyń talantyna tánti boldyq
ASTANA. QazAqparat - HUNAN TV telearnasynyń bas dırektory Lıýı Hýanbın myrza «Singer-2017» baıqaýynyń fınalyn tamashalaý úshin Qytaıǵa kelgen resmı qazaqstandyq delegatsııany qabyldady, dep habarlady QR Mádenıet jáne sport mınıstrliginiń baspasóz qyzmetine silteme jasap «QazAqparat» HAA tilshisi.
Vıtse-mınıstr Aqtoty Raıymqulovamen áńgimelesý barysynda Lıýı Hýanbın qazaqstandyq ónerdiń áleýetine óte joǵary baǵa berdi. "Bizdiń baıqaýda Dımash Qudaıbergenovtiń sátti óner kórsetýi qazaqstandyq ánshilik ónerdiń joǵary deńgeıin kórsetedi. Biz onyń darynyna tánti boldyq", - dedi ol.
Dımashty qoldaý úshin kelgen qazaqstandyq delegatsııa quramynda Qazaq ulttyq óner akademııasynyń rektory Aıman Musaqojaeva, "Astana opera" teatrynyń dırektory Ǵalym Ahmedııarov, Ashat Maemırov, Dımashtyń ata-anasy - Qanat pen Svetlana Aıbaevtar bar. Delegatsııaǵa Qytaıdaǵy QR Elshisi Shahrat Nuryshev te qosyldy.
Eske salsaq, keshe qazaqstandyq ánshi Dımash Qudaıbergenov «Singer 2017» baıqaýynyń fınalynda ekinshi oryn aldy. Fınalda Dımash pen qytaılyq ánshi Shan Ventsze Maıkl Djeksonnyń The Way You Make Me Feel, Erth song, Billie Jean jáne Dangerous ánderin oryndady.
