Hýn Bın: Silk Way Star jobasy mádenıetterdiń toǵysý alańyna aınaldy

ASTANA.KAZINFORM - Qytaı memlekettik birinshi sanatty. tanymal kompozıtor, mýzykalyq prodıýser, Silk Way Star halyqaralyq telejobasynyń tóreshisi Hýn Bın Kazinform tilshisine suhbat berip, joba týraly pikirimen bólisti.

Hýn Bınnyń aıtýynsha, Silk Way Star jobasy jaı ǵana án baıqaýy emes, sonymen birge bul mádenı almasý, mádenı toǵysý alańy.

- Bul jerde halyqtar arasyndaǵy ózara túsinistik pen tanystyq kóbirek kórinis tapty. Shyn máninde, bul óte mańyzdy. Sebebi eger bul tek án aıtý ǵana bolsa, onda bul óte birjaqty bolar edi. Al eger oǵan ulttyń elementteri qosylsa, bir-biriniń mádenıetin, ómir saltyn túsinse, menińshe, bul áldeqaıda maǵynaly, - dedi ol.

Sonymen qatar, kompozıtor jobanyń ereksheligi týraly óz oıyn aıtty.

- Menińshe, bul baǵdarlama óte jaqsy jasalǵan jáne óte muqııat oılastyrylǵan. Ár shyǵarylymda túrli etnıkalyq elementter engizilgen – bul da jobanyń erekshe tusy. Onyń ústine búkil protsestiń qurylymy Eurovision sııaqty, biraq menińshe, bul odan da bir saty alǵa shyqqan. Sebebi Eurovision – úlken sahnada ótedi, al bul baǵdarlamada kórermenmen ózara árekettesý kóbirek, - dedi Hýn Bın.

Aıta keteıik, osy ýaqytta Jibek Joly telearnasynan Azııanyń alǵashqy vokaldyq megajobasy — Silk Way Star-dyń fınaldyq shoýy translıatsııasy ótip jatyr. Joba kórsetilimi shamamen 1 mlrd adamdy qamtıdy.

Osyǵan deıin habarlaǵanymyzdaı, Memleket basshysy Silk Way Star halyqaralyq jobasynyń qatysýshylaryn quttyqtady.