Huawei CAPIF forýmynda bolashaqtyń tsıfrlyq ınfraqurylymyna arnalǵan sheshimderin tanystyrdy
ALMATY. KAZINFORM — Almatyda ınternet pen tsıfrlyq transformatsııany damytýǵa arnalǵan mańyzdy aımaqtyq sharalardyń biri — CAPIF IV Halyqaralyq ınternet-forýmy ótti.
Forýmǵa 20-dan astam elden 250-den asa qatysýshy jınaldy. Olardyń qatarynda memlekettik qurylymdardyń, halyqaralyq uıymdardyń, baılanys operatorlarynyń, derekter ortalyqtarynyń, provaıderlerdiń, zertteý ortalyqtary men tehnologııa ázirleýshileriniń ókilderi bar.
Talqylaýdyń negizgi taqyryptary — IPv6 protokolyna kóshý, pırıngtik jeliler men trafık almasý núktelerin damytý, marshrýtızatsııa jáne jelilerdiń qaýipsizdigi, sondaı-aq jańa tehnologııalardyń telekommýnıkatsııa, memlekettik sektor, kólik jáne ónerkásip salalaryndaǵy praktıkalyq qoldanylýy boldy. Erekshe nazar IPv6-tyń jasandy ıntellekt (JI) jáne mashınamen oqytý tehnologııalarymen yqpaldasýyna aýdaryldy, sebebi mundaı úılesim trafıkti ıntellektýaldy basqarýdyń, IoT pen bultty platformalardy damytýdyń jáne bolashaqtyń tsıfrlyq ekojúıelerin qalyptastyrýdyń negizin qalaıdy.
— Búgin biz halyqaralyq deńgeıdegi tehnologııalardyń tsıfrlyq transformatsııanyń negizgi qozǵaýshy kúshine aınalǵanyn kórip otyrmyz. IPv6 engizý qaýipsiz, aýqymdy ári ıntellektýaldy jeliler qurýǵa jol ashady, al bul derekter ekonomıkasynyń, JI men bolashaq servısterdiń damýy úshin negiz bolmaq. Qazaqstan úshin bul — jahandyq tsıfrlyq keńistikte óz pozıtsııasyn nyǵaıtý jolyndaǵy strategııalyq qadam, — dep atap ótti Qazaqstan Respýblıkasy Jasandy ıntellekt jáne tsıfrlyq damý mınıstrliginiń Telekommýnıkatsııalar komıteti tóraǵasynyń orynbasary Oljas Kabenov.
Sarapshylardyń aıtýynsha, IPv6 engizý júktemege tótep beretin, kıberqaýipsizdik deńgeıi joǵary, ıkemdi ári turaqty jeliler qurýdyń jańa múmkindikterin ashady. Forým barysynda IPv6-tyń telekommýnıkatsııalar, ónerkásip, kólik jáne memlekettik sektordaǵy praktıkalyq qoldaný úlgileri qarastyrylyp, jańa býyn jelileriniń jahandyq jáne aımaqtyq damý úrdisteri belgilendi.
Forým qatysýshylarynyń erekshe nazaryn Huawei usynǵan sheshimder aýdardy. Kompanııa IPv6 protokolynyń tsıfrlyq ınfraqurylymdy damytýdaǵy praktıkalyq áleýetin kórsetip, jańa býyn jelilerin qurýǵa baǵyttalǵan tehnologııalardy tanystyrdy. Bul jeliler joǵary qaýipsizdigimen, aýqymdylyǵymen jáne ınnovatsııalyq servıstermen yqpaldasýǵa daıyn bolýymen erekshelenedi. Huawei usynǵan tásil IPv6-tyń jaı ǵana tehnıkalyq standart emes, bolashaqtyń syn-qaterlerine jaýap bere alatyn turaqty ári ıkemdi ekojúıelerdi qalyptastyrý quralyna aınala alatynyn kórsetti.
— IPv6 protokoly qazirdiń ózinde tsıfrlyq transformatsııanyń irgetasyna aınalyp, jahandyq tehnologııalyq ekojúıeni qalyptastyrýda basty ról atqaryp otyr. Qazaqstan úshin bul baǵyt aıryqsha mańyzdy, óıtkeni el tsıfrlyq damý salasyndaǵy ulttyq strategııasyn belsendi júzege asyryp, óńirlik kóshbasshylyq pozıtsııasyn nyǵaıtýǵa umtylýda. Huawei memlekettik qurylymdarmen jáne salalyq seriktestermen birlese otyryp, jańa býynnyń turaqty, qaýipsiz ári ıntellektýaldy ınfraqurylymyn qurý úshin halyqaralyq tájirıbesimen, ozyq sheshimderimen jáne tehnologııalarymen bólisýge daıyn, — dedi Huawei derekter baılanysy ónimderi jelisiniń marshrýtızatorlar domeni boıynsha vıtse-prezıdenti Xu Huan.
Halyqaralyq yntymaqtastyq pen tájirıbe almasý IPv6 pen basqa da ǵalamdyq deńgeıdegi tehnologııalardy jedel engizýdiń negizgi faktorlarynyń biri retinde ataldy. CAPIF forýmy Qazaqstannyń álemdik tsıfrlyq úrdisterge belsendi túrde kirigip qana qoımaı, bolashaqtyń ıntellektýaldy ári turaqty ınfraqurylymyn qurýda aımaqtyq kóshbasshylardyń birine aınalýǵa daıyn ekenin kórsetti.