«Hronıkadan bolashaqqa» kınolektorııi Qostanaıda aıtýly mádenı sharaǵa aınaldy
ASTANA. KAZINFORM — Qostanaıda ótken kınolektorıı baǵdarlamasyna «Jolbarys: taıgadan dalaǵa», «Sert», «ARAL» jáne «Travel Kazakhstan» derekti fılmderi endi. Olardyń árqaısysynda el úshin mańyzdy oqıǵalar otandastarymyzdyń taǵdyry arqyly baıandalady.
Prezıdent Teleradıokesheniniń 30 jyldyǵyna arnalǵan respýblıkalyq kınolektorıı óńirdiń mádenı ómirine serpin bergen aıtýly sharalardyń birine aınaldy.
Qostanaı oblysy mádenıet basqarmasy basshysynyń orynbasary Erlan Ábilovtiń aıtýynsha, joba aımaq turǵyndaryna otandyq derekti kınomen tanysyp qana qoımaı, el tarıhyndaǵy mańyzdy kezeńderge qaıta úńilýge múmkindik beredi.
— Bul elimizdiń tarıhy, tabıǵaty, mádenıeti jáne qazirgi damýy týraly qundy aqparat. Derekti kıno ótkendi búginmen baılanystyryp, tarıhtan sabaq alýǵa, el jetistikterin baǵalaýǵa jáne bolashaqqa kóz júgirtýge múmkindik jasaıdy. Mundaı aǵartýshylyq jobalardyń jas urpaq úshin mańyzy zor, — dedi Erlan Ábilov.
Qostanaı kórermenine arnalǵan kınolektorıı baǵdarlamasyn ázirleý kezinde avtorlar qoǵam ómiriniń túrli qyrlaryn qamtıtyn ózekti ári áleýmettik mańyzy joǵary taqyryptarǵa basymdyq bergen.
Solardyń biri — «Jolbarys: taıgadan dalaǵa» fılmi. Kartına Qazaqstanda turan jolbarysyn qaıta jersindirý jumystaryna arnalǵan. Prezıdent Teleradıokesheni Derekti kıno ortalyǵynyń redaktory Madına Arǵynnyń aıtýynsha, túsirilim toby bul taqyrypty shamamen eki jyldan beri baqylap keledi.
2026 jylǵy mamyrda Reseı Prezıdenti Vladımır Pýtınniń Astanaǵa memlekettik sapary barysynda Qazaqstanǵa erekshe syılyq — Qıyr Shyǵystaǵy taıgadan Іle-Balqash rezervatyna jetkizilgen tórt amýr jolbarysy tabystaldy. Prezıdent Qasym-Jomart Toqaev bul syılyqty Reseı kóshbasshysynyń saparyndaǵy «erekshe tartý» dep ataǵan bolatyn.
Fılmde jolbarystardyń Qazaqstanǵa jetkizilýi, jańa ortaǵa beıimdelýi jáne mamandardyń atqaryp jatqan jumysy egjeı-tegjeıli kórsetiledi. Kórermen janýarlardyń ózimen ǵana emes, tabıǵatty qorǵaýǵa baǵyttalǵan kúrdeli protsespen de tanysady. Atap aıtqanda, aýmaqty daıyndaý, qorek bazasyn qalpyna keltirý, janýarlardyń minez-qulqyn baqylaý jáne olardyń bolashaqta tirshilik etýine qolaıly jaǵdaı jasaý jumystary qamtylǵan.
Kórkem ári mazmundy fılm qostanaılyqtardyń da kóńilinen shyqty. Kórermenderdiń biri Naýryzbek Birmaǵambetov kartına joıylyp ketken janýarlar popýlıatsııasyn qalpyna keltirý jumystarynyń artynda qanshama eńbek jatqanyn kórsetetinin atap ótti.
— Fılmniń jalǵasy bolady dep úmittenemin. Jolbarystardyń Qazaqstan aýmaǵyna qalaı beıimdelgenin bilgimiz keledi, — dedi Naýryzbek Birmaǵambetov.
Kınolektorıı baǵdarlamasynan «Sert» fılmi de erekshe oryn aldy. Kartınada 2024 jyldyń kókteminde alapat tabıǵı apatqa ushyraǵan óńirlerdi, sonyń ishinde Qostanaı oblysyn qalpyna keltirý jumystary baıandalady. Fılmniń negizgi ózeginde qıyn jaǵdaıǵa tap bolǵan adamdardyń taǵdyry, qutqarýshylar men eriktilerdiń eńbegi, eń bastysy, aýqymdy apat kezindegi qazaqstandyqtardyń birligi kórsetilgen.
«Sert» fılmi kórermenge eń qıyn sátterde Prezıdent Qasym-Jomart Toqaevtyń «zardap shekken birde-bir azamat kómeksiz qalmaıdy» degen ustanymdy alǵa qoıǵanyn eske saldy. Memleket basshysy óńirlerdegi jaǵdaıdy jeke baqylaýda ustap, evakýatsııalaý, materıaldyq kómek kórsetý jáne turǵyn úılerdi qalpyna keltirý jóninde tapsyrmalar berdi.
Nátıjesinde zardap shekken azamattarǵa ótemaqy tólenip, baspanasynan aıyrylǵan otbasylar úshin jańa úıler salyndy jáne satyp alyndy. Derekti fılm qıyn sátte qabyldanǵan sheshimderdiń jergilikti jerde qalaı júzege asqanyn jáne adamdardyń qalypty ómirge qaıta oralýyna qalaı yqpal etkenin kórsetedi. Osylaısha qıyn jaǵdaılardyń hronıkasy el birliginiń aıǵaǵyna aınalady.
Keı kórermen úshin fılmdi tamashalaý erekshe áserli boldy. Solardyń biri — Berik Nurmuhambetov. Ol sý tasqyny kezinde eriktiler qatarynda bolyp, zardap shekken turǵyndarǵa kómek kórsetken. Sondyqtan fılmdegi kóptegen kórinisti ol jaı ǵana tarıhı hronıka retinde emes, ózi bastan ótkergen oqıǵanyń bir bóligi retinde qabyldady.
— Bul Qazaqstan tarıhynyń mańyzdy bóligi. Ony este saqtap, jas urpaqqa kórsetý kerek. Mundaı derekti fılmder oqıǵany baıandap qana qoımaıdy, patrıotızmge tárbıeleıdi, ózara kómek pen birliktiń mańyzyn kórsetip, jastardy biriktiredi. Osyndaı kınolektorıılerdi jıi ótkizý qajet dep oılaımyn, — dedi ol.
«Hronıkadan bolashaqqa» respýblıkalyq kınolektorııi buǵan deıin Astana, Qyzylorda, Túrkistan, Shymkent, Taraz, Aqtaý, Atyraý, Oral, Aqtóbe, Óskemen, Semeı, Petropavl, Pavlodar, Jezqazǵan jáne Kókshetaý qalalarynda uıymdastyrylǵan. Qostanaı mereıtoılyq jobanyń óńirlerdegi kezeńin qorytyndylady. Joba 25 qyrkúıekte Almaty qalasynda túıindelmek.
