Hromtaý, Sátbaev, Balqash, Qulsary qalalary Sarannyń úlgisi boıynsha damıdy
ASTANA. KAZINFORM – Premer-mınıstr Oljas Bektenov Úkimet otyrysynda Aqtóbe, Atyraý jáne Qaraǵandy oblystarynyń monoqalalaryn damytýda Saran qalasynyń úlgisin negizge alýdy tapsyrdy.
«Ońtaıly tásilder Saran men Tekelige monoqalalar tiziminen shyǵýǵa múmkindik berdi. Tekeli qalasynda 10 jyl ishinde ónerkásip óniminiń kólemi 3 esege artty, al jumys istep turǵan kásipkerlik sýbektileriniń sany eki esege jýyq ósti. Saran qalasynyń jaǵdaıy ájeptáýir ózgerdi. Damý kórsetkishteri aıtarlyqtaı arta tústi. Óńir ákimi qabyldanǵan sharalar men jańa óndirister, ındýstrııalyq aımaq týraly baıandady. Árıne, jańa óndiristerdiń qurylýy osy qalalardyń damýyna tyń serpin berip, halyqtyń ál-aýqatyna oń áser etti. Men jaqynda Saran qalasynda boldym, óndiristerdi aralap, jergilikti turǵyndarmen kezdestim. Kóńil kúıleri jaqsy. 20 jyldan astam jumyssyz otyrǵan adamdar jumysqa kiristi. Bul – ózge monoqalalarǵa úlgi bolýǵa laıyq mysaldar», - dedi ol.
Oljas Bektenov Saran qalasynyń tájirıbesi keleshekte búkil respýblıkaǵa taratylatynyn aıtty.
«Sondyqtan Ónerkásip mınıstrligi Aqtóbe, Atyraý jáne Qaraǵandy oblystarynyń ákimdikterimen birlesip, Saran qalasynyń úlgisi boıynsha osy jyldyń sońyna deıin Hromtaý, Sátbaev, Balqash jáne Qulsary monoqalalarynda ındýstrııalyq aımaqtar qurýy qajet. Keıin bul tájirıbeni basqa monoqalalarǵa da taratý kerek», - dedi Úkimet basshysy.
