Hromtaý aýdanynda karantındik shekteý sharasy kúsheıtildi
AQTÓBE. QazAqparat – Aqtóbeniń Hromtaý aýdanynda shekteý sharasy kúsheıtildi, dep habarlaıdy QazAqparat tilshisi.
Aqtóbe oblystyq bas memlekettik sanıtarııalyq dárigeriniń jańa qaýlysy shyqty. Hromtaý aýdanynda shekteý sharasy kúsheıtildi.
«Bilim alý ortalyqtaryndaǵy bala sany 15-ten aspaýy tıis. Sonymen birge medıtsınalyq ortalyq, kabınetter men stomatologııalarǵa aldyn ala jazylyp barýy tıis. Bankterdiń, halyqqa qyzmet kórsetý ortalyqtarynyń, «Qazposhta» AQ-nyń bólimshesi jumys kúnderi saǵat 09.00-den 18.00-ge deıin qabyldaý ótkizedi. Mektepke deıingi mekemelerindiń kezekshi toptaryndaǵy bala sany 15-ten aspaýy tıis. Dinı nysandarda ujymdyq is-shara ótkizilmeıdi», - dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.
Sonymen birge qoǵamdyq tamaqtaný oryndarynda adam sany 50-den aspaýy tıis. Jumys ýaqyty saǵat 07.00-den 00.00-ge deıin. Azyq-túlik dúkenderi, bazarlar, saýda oryndary tek jumys kúnderi ishki tártip boıynsha qyzmet kórsete alady. Mádenıet nysandarynda adam sany 30-dan aspaýy qajet. Búginge deıin Hromtaý aýdany boıynsha barlyǵy 149 adam koronavırýs ınfektsııasyna shaldyqsa, onyń 72-i sımptomsyz.
Aıta keteıik, ótken táýlikte óńirde 19 adamnan koronavırýs ınfektsııasy anyqtaldy. Aqtóbe qalasy men Oıyl, Hromtaý, Muǵaljar aýdandarynyń turǵyndary derttiń sımptomdy túrine shaldyqqan. Aýrýshańdyqtyń ósý deńgeıi 0,5% qurady. Búginge deıin barlyǵy 4131 jaǵdaı tirkelse, onyń 95 paıyzdan astamy jazyldy. Qazir 600-den astam adam úı karantıninde. Naýqastarmen qatys-qatynasta bolǵan aqtóbelikter eki apta dáriger baqylaýynda bolady.
