Hromtaý aýdany «sary» aımaqtan shyqty

AQTÓBE. QazAqparat – Aqtóbe oblysynyń Hromtaý aýdanynda epıdemıologııalyq jaǵdaı turaqty. Aýdan «sary» aımaqtan shyqty, dep habarlaıdy QazAqparat tilshisi.

Hromtaý aýdanynda 18 aqpan kúni shekteý sharasy kúsheıtildi. Munda jeksenbi kúnderi iri saýda oryndary, bazarlar jumysyn toqtatty. Sonymen birge adam kóp shoǵyrlanatyn mekemelerde sanıtarııalyq talap kúsheıdi . Arada eki apta ótkende shekteý sharasy qaıta jeńildedi.

«Hromtaý aýdany turǵyndary arasynda koronovırýs ınfektsııasynyń aldyn alý jónindegi sharalardy kúsheıtý týraly Aqtóbe oblysynyń bas memlekettik sanıtarııalyq dárigeriniń qaýlysy óz kúshin joıdy. Hromtaý «sary» aımaqtan shyqty», - dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.

Aıta keteıik, ótken táýlikte óńirde 3 adamnan koronavırýs ınfektsııasy anyqtaldy. Qazir oblys pen barlyq aýdan «jasyl» aımaqta tur. Búgin muǵalimder men polıtsııa qyzmetkerleri vaktsına salyna bastady.