Hromtaý ákimi salynbaǵan júrginshiler jolyna bıýdjet qarjysyn aýdaryp jibergen

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti, Ádep keńesi búgin Hromtaý qalasynyń ákimi Asqar Nurtazınge qatysty isti qarady. Hromtaý aýdany prokýrorynyń orynbasary Ánýarbek Eskendirovtiń aıtýynsha, ótken jyldyń sońynda ákim 7 mıllıon teńgeni júrginshiler jolyna tóseýge aýdaryp jiberip, atqarylmaǵan jumysty qabyldap alǵan. Prokýratýra tekserisinen keıin anyqtalǵan zańsyzdyq búgin ádep keńesinde qaraldy.

«Memleket qarjysynyń maqsatty ıgerilýi tekserilip, zańsyzdyq anyqtaldy. Aqtóbe qalasynyń ákimi Asqar Nurtazın «Aqtóbeelektrostroı» JShS-ne 7 mıllıon teńgeni aýdaryp jibergen. Bul qarjyǵa 4 kóshe men 3 shaǵyn eskirtkish janyna tas tóseýi tıis bolatyn. Kelisimshartqa qol qoıyp, 5 kúnnen soń aqshany aýdarady. Negizi jumys tolyq atqarylǵan soń ǵana qarjy berilýi tıis»,- dedi prokýror Ánýarbek Eskendirov.

Hromtaý qalasynyń ákimi Asqar Nurtazın jyl sońynda únemdelgen qarjyny qaıta bólip, júrginshiler jolyn salý úshin baıqaý ótkizedi. Jeńimpaz anyqtalǵan kezde aýa raıyna qaramastan aqshany aýdaryp jiberdi. Al jumys atqarylmaı, zańsyzdyqty prokýratýra anyqtady.

«Memleket qarjysyn ıgeremiz dep qysta asfalt tósep, jarty jyldan soń ol qırap qaldy. Bul joly da dál solaı. Burynǵy jaǵdaıynda qylmystyq is qozǵalýy tıis edi. Júrginshiler jolyn durys tósemegen kompanııany tekserý artyqtyq etpes edi. Ákim «ýaqytsha, maǵan báribir dep oılaıtyn shyǵar»,- dedi Ádep keńesiniń múshesi Qaırat Súntaev.

Ádep keńesine qatysqan qala ákimi Asqar Nurtazın jyl sońynda baıqaý ótkizip, joldyń salynbaıtynyn bilse de táýekelge barǵanyn jetkizdi.

«Qys túsip, boran soǵyp ketti. Al kompanııa jol tóseýge qajetti tasty alyp, jetkizip qoıdy. Ótken jyly úlgermedi, bıyl bárin qalpyna keltirdi. Ári merdiger 705 myń teńge aıyppul tóledi»,- dedi Hromtaý qalasynyń ákimi Asqar Nurtazın.

Aıta keteıik, Ádep keńesi Hromtaý qalasy ákiminiń qyzmetine tolyq saı emes degen uıǵarym qabyldady.