Hrıstıandardyń sýǵa shomylý rásimi Astananyń 4 jerinde ótedi

ASTANA. QazAqparat - Astanada 18 qańtar kúni keshke pravoslav qaýymy úshin sýǵa shomylý dinı rásimi ótedi. Astanalyqtar qalanyń 4 jerinde belgilengen aýmaqta sýǵa súńgı alady, dep habarlaıdy QazAqparat qalalyq ákimdikke silteme jasap.

«Kreşenıe Gospodnıa» dinı meıramyna oraı, Astanada barlyq shirkeýlerde qudaıǵa qulshylyq etý rásimi ótedi. 2018 jyldyń 18 qańtarynda saǵat 19:30-da dinı qyzmetkerler jáne shirkeýge kelýshiler Konstantın jáne Elena atyndaǵy soborynan Esil ózeniniń jaǵalaýyna deıin jaıaý júrip ótedi», dep habarlandy Astana qalasy ákimdiginiń resmı saıtynda.

Sonymen birge, oń jaǵalaýda M. Ótemisuly atyndaǵy Oqýshylar saraıy, «Grand Alataý» turǵyn-úı kesheniniń jáne sol jaǵalaýda «Stolıchnyı» saıabaǵy mańyndaǵy jaǵalaýda (Amfıteatr men Regis Astana qonaq úıiniń mańy) sýǵa túsýge arnalǵan oryndar ázirlengen.

Dinı rásim barysynda Astana qalasynyń Tótenshe jaǵdaılar departamenti Sýda qutqarý qyzmeti jáne Іshki ister departamentiniń qyzmetkerleri turǵyndardyń qaýipsizdigin qamtamasyz etedi. Sondaı-aq, bul kúni jedel járdem kólikteri de kezekshilik jasaıdy.