Hrapýnovtardyń ústinen qozǵalǵan qylmystyq is sotqa jiberiledi
ASTANA. QazAqparat - Jemqorlyqqa kúdikti Almaty qalasynyń burynǵy ákimi Vıktor Hrapýnov qylmystyq istpen tanysý úshin Qazaqstanǵa kelgen joq. Bul týraly búgin Sybaılas jemqorlyqqa qarsy is-qımyl ulttyq bıýrosy qyzmetiniń aǵymdaǵy jyldyń 9 aıyndaǵy jumys qorytyndysyna arnalǵan brıfıngte vedomstvoǵa qarasty Tergeý departamenti dırektorynyń orynbasary Olesıa Keksel aıtty, dep habarlaıdy QazAqparat.
Onyń aıtýynsha, shetelde júrgen Vıktor Hrapýnovty tergeýge shaqyrý týraly habarlamanyń buqaralyq aqparat quraldarynda jarııa etilýi kúdiktini qulaqtandyrý maqsatynda jasalǵan. Osyǵan oraı kúdikti 2017 jyldyń 17 qazany kúni saǵat 15-00-ge deıin Ulttyq bıýro ǵımaratyna kelýi tıis bolatyn. Alaıda ol kelmedi.
«Hrapýnovtarǵa qylmystyq topty uıymdastyrý jáne basqarý, para alý, qylmystyq jolmen alynǵan aqshany qolma-qol aqsha aınaldyrý faktileri boıynsha kúdik keltirilýde. Olardyń zańsyz jolmen alǵan kiristeriniń jalpy somasy 250 mln AQSh dollarynan asyp jyǵylady. Olarmen qatar qylmystyq jaýapkershilikke Vıktor Hrapýnovqa burynǵy baǵynyshtylar men Láılıa Hrapýnovaǵa tıesili kompanııalardyń basshylary, jalpy 14 adam tartylýda. Barlyq faktiler boıynsha tergeý amaldary júrgizildi jáne qazan aıynyń sońyna deıin 28 epızod boıynsha qylmystyq is Hrapýnovtardy syrttaı sottaý úshin sotqa jiberiledi», - dedi Keksel.
