Hrapýnovtar isi: Bir adam 5 fırmanyń bastyǵy bolǵan
Sottalýshy Aınagúl Sadyqbaevanyń aıtýynsha, ol 2002-2003 jyldary Leılanyń eki kompanııasynda bas esepshi qyzmetin atqarǵan. Odan keıin úsh JShS bas dırektory qyzmetine taǵaıyndalǵan. Ol aıtqandaı, barlyq satý-satyp alý týraly mámileni ákimniń eks-jubaıy júrgizgen.
«Leıla Hrapýnova kompanııany basqarǵanda turǵan eshteńe joqtyǵyn aıtty. Sol kezde onyń joldasy ákim boldy. Men osyndaı laýazymdy tulǵalar zańǵa qaıshy eshteńe jasamaıtyn shyǵar degen oıda boldym. Leıla kabınetke shaqyryp, JShS qurý týraly qujattarǵa qol qoıdyratyn. Qaǵazdardy kompanııanyń zańgerleri ázirlegen. Meniń mindetim tek qana qol qoıý bolatyn», - dedi Aınagúl Sadyqbaeva.
Qazir áıel memlekettik jer ýchaskeleri men jyljymaıtyn múlikti zańsyz talan tarajǵa saldy dep aıyptalyp otyr.
Ekinshi sottalýshy Abylaıhan Qarymsaqov qaǵaz júzinde 5 fırmanyń «bastyǵy» bolǵan.
1995 jyly «Tań» telearnasynyń basshysy Leıla Hrapýnova Qarymsaqovty jalpy máseleler boıynsha orynbasar bolyp qyzmet atqarýǵa shaqyrǵan.
«Men kólik, qural-jabdyq, ǵımarattardy baqylaýmen aınalystym. Hrapýnov qala ákimi bolǵanda, Leıla saýdamen aınalysa bastady. Men qasynda boldym. Birneshe JShS quryldy. Kompanııalardyń qujaty, móri bári Leılada bolatyn», - dedi Qarymsaqov.
Onyń aıtýynsha, barlyq mámileler Leıla Hrapýnovanyń baqylaýymen júrgizilgen.
Budan buryn habarlaǵanymyzdaı, Leıla Hrapýnova 32 jyljymaıtyn múlik, 16 jer ýchaskesiniń ıesi bolǵan.