Hrapýnov isi: 9 fıgýrant qylmystyq jaýapkershilikten bosatyldy
Vıktor Hrapýnovtyń burynǵy orynbasary, laýazymyn teris paıdalandy degen aıyp taǵylǵan 71 jastaǵy ıAkov Zaetsqa qatysty qylmystyq istiń merziminiń ótip ketýine baılanysty toqtatyldy. Qylmystyq jaýaptan: Ǵabıden Qaıymsultanov, Qýandyq Bısqultanov, Abaı Saparov, Altaı Qasymov, Serik Esmuqanov, Aınakúl Sadyqbaeva, Abylaıhan Qarymsaqov jáne Abdýl-Ǵazız Muqashev bosatyldy. Olardyń barlyǵy 2000-jyldardyń basynda Almaty ákimdiginiń janyndaǵy túrli qurylymdarda jáne Hrapýnovtardyń baqylaýdaǵy jekemenshik kompanııalarynda jumys istegen.
Buryn sýdıa Qasym Qalmaǵambetov memlekettik múliktiń ysyrap etilýi týraly atyshýly istiń basty fıgýranttary Vıktor jáne Leıla Hrapýnovtarǵa úkim shyǵarǵan bolatyn. Almatynyń burynǵy ákimine qaýipsizdigi barynsha kúsheıtilgen kolonııada 17 jyl merzimge bas bostandyǵynan aıyrý, onyń áıeline 14 jyldyq túrme merzimi, kúıeý balasy Aııar Ilıasovqa 5 jyl bas bostandyǵynan aıyrý jazasy belgilengen. Úkim sottalǵandar ustalǵannan keıin kúshine enedi. Óıtkeni Qazaqstannan 2007 jyly shyǵyp ketken Vıktor Hrapýnov qazirgi kezde zaıybymen birge Shveıtsarııada turady.
Eske sala keteıik, erli-zaıypty Hrapýnovtarǵa memleket múlkin jymqyrý, alaıaqtyq, laýazymdaryn teris paıdalaný, para alý jáne uıymdasqan qylmystyq toptyń jymqyrǵan múlikterin zańdastyrý aıyptary taǵylǵan. Memleketke keltirilgen zalal 250 mıllıon dollardan asady.