HRANA: Irandaǵy narazylyq aktsııalary kezinde qaza tapqandar sany 544 adamǵa jetti
ASTANA. KAZINFORM — Ekonomıkalyq máselelerge baılanysty Iranda bastalǵan narazylyq aktsııalary saldarynan qaza tapqandar sany 544 adamǵa jetti, dep habarlaıdy HRANA.
AQSh-ta ornalasqan Adam quqyqtaryn qorǵaý belsendileriniń jańalyqtar agenttiginiń (Human Rights Activist News Agency, HRANA) habarlaýynsha, Irandaǵy narazylyq aktsııalary 15-kún qatarynan jalǵasyp jatyr.
Irandaǵy jalpyulttyq narazylyqtardyń on besinshi kúninde HRANA sońǵy 24 saǵat ishinde jańa derekter men vızýaldy materıaldardyń túskenin habarlady. Bul aqparat el birneshe kún qatarynan ınternetsiz otyrǵanyna qaramastan jınalǵan. Internet baılanysynyń joqtyǵy derekterdi jınaý men táýelsiz tekserýdi aıtarlyqtaı qıyndatyp otyr.
Ásirese Tegeran mańyndaǵy máıitter saqtalǵan oryndarǵa qatysty beınematerıaldar men kýálikter qaza tapqandar sany resmı derekterden áldeqaıda joǵary ekenin jáne repressııalardyń aýqymdy sıpat alǵanyn kórsetedi. Osy rette bıliktiń resmı málimdemeleri barǵan saıyn qatańdap, qaýipsizdik rıtorıkasyna aýysty, al jaýapkershilik «terrorıster» men «qarýly búlikshilerge» júktelip jatyr.
Internettiń óshirilýi úshinshi kúnge jalǵasyp jatyr. NetBlocks dereginshe, Irannyń syrtqy álemmen baılanysy qalypty deńgeıdiń nebári 1 paıyzyna teń, bul halyqtyń aqparatqa qol jetkizýi men ózara baılanysyn is júzinde shektep otyr.
HRANA-nyń tekserilgen málimetteri boıynsha, narazylyq aktsııalary eldiń barlyq 31 provıntsııasyndaǵy 186 qalada, jalpy 585 jerde ótti. Qazirgi jaǵdaı boıynsha:
-
47 áskerı qyzmetker men quqyq qorǵaý organynyń ókili;
-
bir memlekettik qyzmetker (prokýror);
-
483 narazylyq bildirýshi qaza tapqan.
Qaza tapqandardyń arasynda 18 jasqa tolmaǵan 8 bala bar. Sondaı-aq qurban bolǵandardyń ishindegi 5 azamattyń narazylyqqa esh qatysy bolmaǵan.
Osylaısha, rastalǵan adam ólimi 544-ke jetti. Sonymen qatar HRANA áli tekserilip jatqan 579 ólim deregi týraly qosymsha habar bermek.
Aıta keteıik, Iran Islam Respýblıkasynyń prezıdenti Masýd Pezeshkıan halyqqa úndeý arnap, Iranda reforma júrgizýge daıyn ekenin málimdedi.