HRANA: Iranda bolǵan oqıǵalar kezinde 6 961 adam qaza tapqan
ASTANA. KAZINFORM - Iranda narazylyq aktsııalary aıaqtalǵanyna qaramastan, HRANA qaza tapqandar men ustalǵandar týraly derekterdi tirkep, jańartyp jatyr, dep jazady Anadoly.
Ekonomıkalyq qıyndyqtar aıasynda 2025 jylǵy 28 jeltoqsanda bastalyp, 8–9 qańtar kúnderi qaýipsizdik kúshteri tarapynan kúshpen basylǵan Irandaǵy narazylyqtar barysynda qaza tapqandar sany 6 961 adamǵa jetti. Bul týraly AQSh-ta ornalasqan «Irandaǵy adam quqyqtary jónindegi belsendiler» aqparat agenttigi (HRANA) habarlady.
Vırdjınııa shtatynda ornalasqan HRANA agenttiginiń málimetinshe, elde narazylyq aktsııalary toqtaǵanymen, jańa ólim-jitim men ustaýlarǵa qatysty derekterdi tirkeý jumysy áli de júrip jatyr.
Agenttik taratqan aqparatqa sáıkes, Irannyń ár óńirinde ótken narazylyqtar jáne olarmen baılanysty qaqtyǵystar kezinde 51 591 adam ustalǵan. Qaza tapqandardyń jalpy sany — 6 961 adam, onyń 214-i qaýipsizdik kúshteriniń qyzmetkerleri.
Sonymen qatar HRANA taǵy 11 730 jaǵdaı tekserý satysynda turǵanyn málimdedi. Eki kún buryn agenttik qaza tapqandar sanyn 6 955 adam dep baǵalaǵan bolatyn.
Irandaǵy narazylyqtar
Irandaǵy narazylyqtar 2025 jylǵy 28 jeltoqsanda Tegeranda, atap aıtqanda Úlken bazar aýmaǵynda bastaldy. Ulttyq valıýtanyń kúrt qunsyzdanýy men ekonomıkalyq daǵdarystyń tereńdeýine qarsy shyqqan saýdagerler aktsııalardyń bastamashysy boldy.
Keıin narazylyqtar búkil el aýmaǵyna tarady. 8 qańtar kúni el astanasynda aktsııalar qaqtyǵysqa ulasyp, bılik ınternetke qoljetimdilikti shektedi. 8–9 qańtar aralyǵynda qaýipsizdik kúshteri aralasyp, narazylyqtardy kúshpen basty.
Irannyń Shahıdter men ardagerler isteri qory 21 qańtardaǵy málimdemesinde Sot-medıtsınalyq ınstıtýt derekterine súıene otyryp, 3 117 adamnyń qaza tapqanyn habarlady. Olardyń qatarynda qaýipsizdik kúshteriniń qyzmetkerleri men beıbit turǵyndar bar.
Resmı málimetke sáıkes, olardyń 2 427-si bıliktiń aıtýynsha «qarýly terrorıstik toptar» qolynan qaza tapqan qaýipsizdik qyzmetkerleri men beıbit azamattar. Al 690 adamnyń ólimine qatysty naqty aqparat berilmegen.
Osyǵan deıin Irandaǵy narazylyq aktsııalary kezinde qaza tapqandar sany 5 137 adamǵa jetkeni týraly azdyq.