HR sarapshy oqýlyqtardaǵy «Áke tórde, sheshe bosaǵada» modelinen bas tartýdy usyndy
Emotsıonaldyq zeıindi damytý jónindegi tálimger, HR-sarapshy Ásel Muratova mektep oqýlyqtaryndaǵy «Áke tórde, sheshe bosaǵada» modelinen bas tartýdy usyndy, dep habarlaıdy Kazinform.
«Men bilim berý salasynda qundylyqtardy taratý komıssııasyna qatystym. Sol kezde bir oıym boldy. Oqýlyqtarda otbasy qundylyǵy sýretterde qalaı berilip júrgenin bárimiz bilemiz. Áke tórde otyrady. Sheshe úı sharýasyn dóńgelendirip jatady. Meniń oıymsha, oqýlyqtarda otbasynyń zamanaýı modelderin de berý kerek. «Áke tórde, sheshe bosaǵada» degen modeldi ǵana nasıhattamaı, ózge de modelderdi mysal retinde berý kerek. Sýretterde áke de sheshemen birge úı sharýasyna aralasyp jatqany, bala kútimine, sabaǵyna atsalysyp jatqany beınelenýi kerek. Bilim berý júıesinde osyndaı nusqalar nasıhattalsa, oqýlyqtardan kórinis tapsa, bizdiń býynǵa, ásirese erlerge genderlik teńdikti qabyldaý jeńilirek bolatyn edi», - dedi ol BAQ ókilderiniń suraǵyna bergen jaýabynda.
Onyń paıymynsha, genderlik teńdik uǵymynyń túpki mánin túsinbeıtin áıelder de barshylyq.
«Jalpy, ómir men ekonomıkanyń búkil salasyna áıelderdi kiriktirýge baǵyttalǵan sharalar qazir óte kóp. Biraq keıde tipti aqysyz trenıngter men mentorıngterdiń ózine olardy jalynyp júrip keltiremiz. Munyń bári eski túsinikterdiń áserinen. Meniń ózim de burynǵy ustanymdarymdy qaıta qarap, paıymdarymdy ózgertken adammyn. «Jumys isteıtin ana durys ana bola almaıdy» degen qasań qaǵıdam bolǵan. Sol túsinik maǵan jeke bıznes ashýǵa jyldar boıy kedergi jasap keldi. Arnaıy kýrstan ótip, bilimimdi jetildirgennen keıin ǵana jeke bıznesimdi ashtym. Koýchıngke mamandanyp júrgende jumys kóp istesem, ol balama zııan dep oılaıtynymdy baıqadym. Osy oıdy qaıta qaraý kerek boldy. Sonyń arqasynda kóp eńbektenip, durys baǵytta damysam, balama tikeleı úlgi bola alatynymdy uqtym. Qazir negizgi jumysyma ýaqytymnyń 20-30 paıyzy ǵana ketedi. Qalǵan ýaqytymnyń bárin balama arnaımyn. Sondyqtan bizdiń ózimizge ózgerý kerek, ózgeriske umtylý kerek. Qaı jerde jumys istesem de, áıelderdiń damýyna kedergi keltiretin keıs kórgen joqpyn. Kersinishe qoldaý bar, ıaǵnı kóp dúnıe ózimizge baılanysty», - deıdi Ásel Muratova.
Bıznes-tálimger eńbek naryǵyndaǵy trendter áıelderdi erlermen básekelese júrip mansap jasaýǵa ıtermelep otyrǵanyn aıtady.
«Dúnıejúzilik ekonomıkalyq forýmnyń málimeti boıynsha, 2030 jylǵa qaraı álemde 85 mln jumys orny joǵalady da, 69 mln jańa jumys orny ashylady. Joıylatyn jumys oryndarynyń kóbinde áıelder otyr. Mysaly, keńsemen baılanysty jumystyń kóbi jasandy zeıinge senip tapsyrylyp jatyr. Osy oryndardan bosap qalǵan áıelderdi eńbekke aralastyrý úshin jumys berýshiler jumysqa adam qabyldaǵan kezde áıelderge basymdyq bere bastaıdy. Óıtkeni áleýmettik teńgerimdi saqtaý kerek», - deıdi sarapshy.
Aıta keteıik, QR Prezıdent is basqarmasy Medıtsınalyq ortalyǵyna qarasty Medıtsınalyq tehnologııalar jáne aqparattyq júıeler ortalyǵynyń uıymdastyrýymen ótken is-sharaǵa memlekettik qurylymdardyń, belgili medıtsınalyq habtardyń, alpaýyt kompanııalardyń top-menedjerleri, HR jáne IT sarapshylar, bıznes-tálimgerler qatysty.
