Hosteldegi ómir: elorda stýdentteri jańa jataqhanalarda qalaı turyp jatyr
ASTANA. QazAqparat - Astanada kolledj stýdentterine arnalǵan jataqhanalardyń jańa tıpi paıda boldy. Hosteldegi jastardyń ómiri týraly elorda ákimdiginiń resmı saıty baıandaıdy.
Elbasynyń 5 áleýmettik bastamasyn júzege asyrýdyń aıasynda «Ál-Qýat» hosteli «Joǵary bilimniń qoljetimdiligi men sapasyn arttyrý jáne stýdentterge jaǵdaı jasaý sapasyn joǵarylatý» baǵytyn iske asyrýdyń qatysýshysy atandy. Munda búginge deıin elordadaǵy tórt kolledjdiń 400 stýdenti qonystanyp úlgergen. Turǵyndardyń aıtýynsha, jataqhanada turý yńǵaıly. Ár bólmede 3-4 adam turady. Munda tegin ınternet bar. Sondaı-aq, «aspaz» mamandyǵy boıynsha oqıtyn stýdentter óz bilimi men qabiletterin óz betinshe meńgerýi úshin ashana jumys isteıdi.
«Hosteldegi ómir qyzyq ári yńǵaıly. Qazir ár bólmede dýsh kabınasy bar. Buryn jataqhanada turǵanda, turǵyndardyń barlyǵy óz qabatyndaǵy jalǵyz dýshqa baratyn. Biz jaǵdaıymyzdyń jaqsarǵanyna qýanyshtymyz. Bólmelerde árkimniń óz shkafy bar. Bólmelerdi óz talǵamymyzǵa saı etip jaılastyra alamyz», - dep bólisti «Qoǵamdyq tamaqtandyrý jáne servıs kolledji» MKQK-niń 2 kýrs stýdenti Janna Baıahmetova.
Hostelde turý úshin aıyna 27 myń teńge tóleý kerek. Onyń 22 myń teńgesi jergilikti bıýdjetten bólinse, 5 myń teńgesin stýdentter ózderi tóleıdi. Hostel qoǵamdyq tamaqtandyrý jáne servıs kolledjinen alys emes jerde ornalasqan. Jataqhanalary joq kolledjderdiń stýdentteri hostelderde turýǵa nıet bildiredi. Munda ár kolledjdiń tárbıeshisi bar. Ózgermegen ereje: stýdentter saǵat 22:00-den kesh qalmaı hostelge oralýy tıis.
«Balalar 2 aýysymda oqıdy. Olarmen kolledjderdiń tárbıe bólimi jumys isteıdi. Bul bólimdi dırektordyń tárbıe jónindegi orynbasary basqarady», - dep málimdedi qoǵamdyq tamaqtandyrý jáne servıs kolledjiniń dırektory Záýre Qylyshpaeva.
Stýdentterdiń bólmesine kirseń, kóterińki kóńil-kúı men shyǵarmashylyq atmosferaǵa bólenesiń. Ekinshi qabatta belsendi ómirdi birden sezýge bolady. Balalar ózderi úıirmelerdi uıymdastyryp, fleshmobtar men túrli merekelerdi ótkizedi. Úıirmelerdiń arasynda dombyra sabaqtary bar. Ony 2 kýrs stýdentteri uıymdastyrdy.
«Men bala kezimnen dombyrada oınaımyn. Túrli konkýrstarǵa qatystym. Meniń otbasym ınternatsıonaldy. Ógeı ákemniń ulty qazaq. Ol meniń mýzykalyq aspapqa degen mahabbatymdy oıatty. Ýaqyt óte kele men ózime dombyra satyp aldym. Anam meni óner mektebindegi dombyra úıirmesine alyp keldi. Mektepti qyzyl dıplommen támamdadym. Endi mine, kolledjdiń stýdentterin dombyrada oınaýdy úıretemin. Qazir de túrli kontsertter men festıvalge qatysamyn. Bos ýaqytymda dombyrada oınaımyn. Ol maǵan shabyt beredi. Úıirme árkimge damýǵa kómektesedi», - dep áńgimeledi qoǵamdyq tamaqtandyrý jáne servıs kolledjiniń 2 kýrs stýdenti Mıhaıl Abýov.
Sondaı-aq, qyzdarǵa arnalǵan «Syrǵalym» úıirmesi bar. Munda bolashaq tiginshiler qýyrshaqtardy óz qolymen jasaıdy. Bul ispen stýdentter kolledjde de aınalysa alady.
«Hostelge kóship kelgennen beri 6-7 qýyrshaq jasadyq. Matalar, shash, sán buıymdaryn qoldanamyz. Ár qýyrshaqtyń óz esimi bar. Árqaısysyna erekshe yqylaspen qaraımyz. Qýyrshaqtardy jasaǵanda, shyǵarmashylyqqa erik beremiz. Dızaınyn oılap tabamyz. Jumysymyzdyń nátıjesi qýantpaı qoımaıdy», - qoǵamdyq tamaqtandyrý jáne servıs kolledjiniń 2 kýrs stýdenti Anastasııa Mýkanova.
Kolledjdegi tirshilik qaınap jatyr. Balalar óz merekesi 14 jáne 15 qarashada ótetin Stýdentter kúnine daıyndalýda.
Foto: Ildar Manıapov
