Hosteldegi órt: Sýdıa isti prokýratýraǵa qaıtarýdan bas tartty
ALMATY. KAZINFORM – Almatyda 13 adam ólim qushqan hosteldegi órtke qatysty sot protsesi júrip jatyr. Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralýda. QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. Olar – Ádilbek Muhamedıarov pen Aleksandr Pekelnık.
Sot barysynda Ádilbek Muhamedıarovtyń qorǵaýshysy qasaqana órt qoıdy degen nusqany alǵa tartty.
Aıtýynsha, Erkin Tańjaryqov esimdi azamatqa qatysty sotqa deıingi tergeý barysynda qasaqana órteý deregi boıynsha qylmystyq is qozǵalǵan.
Sotta jábirlenýshilerdiń keıbiri qaıǵyly jaǵdaıǵa órt qaýipsizdigi erejelerin buzý emes, úshinshi tulǵanyń qasaqana áreketinen boldy dep eseptep, qylmystyq isti prokýrorǵa qaıtarýdy surady.
Jábirlenýshi taraptyń advokaty da basqa adamdy kúdikti dep taný týraly qaýlyny iske qosýdy surady.
Búgingi sot otyrysynda prokýror Erkin Tańjaryqovqa qatysty aıyp taǵylmaǵanyn, onyń is-áreketteri zańdy túrde dáleldenbegenin, birqatar tergeý jáne jedel-izdestirý sharalarynyń júrgizilmegenin málimdedi.
Sondaı-aq bir kún buryn qylmystyq isti toqtatý týraly sheshim shyǵarylǵan.
Sýdıa Ernar Qasymbekov 2025 jyldyń 11 maýsymynda prokýrormen bekitilgen Almaly aýdandyq polıtsııa basqarmasy bastyǵynyń qaýlysyn oqyp berdi.
– Erkin Tańjaryqovqa qatysty Qazaqstan Respýblıkasy Qylmystyq kodeksiniń 202-babynyń 3-bóliginiń 1-tarmaǵynda kózdelgen qylmystyq quqyq buzýshylyq belgileri boıynsha bótenniń múlkin qasaqana órtep jibergeni úshin qylmystyq qýdalaý onyń is-áreketinde qylmystyq quqyq buzýshylyq quramynyń bolmaýyna baılanysty toqtatyldy, - delingen qaýlyda.
Osyǵan baılanysty sot jábirlenýshiler ókiliniń isti prokýrorǵa qaıtarý týraly ótinishin qanaǵattandyrýdan bas tartý týraly sheshim shyǵardy.
Sot buǵan deıin Erkin Tańjaryqov qylmystyq jaýapkershilikke tartylsa, sot qylmystyq isterdi biriktirý máselesin qaraıtynyn túsindirgen edi. Biraq qazir buǵan negiz joq.
Sýdıa sonymen qatar sot protsesi aıaqtalýǵa jaqyn ekenin atap ótti.
— Mamandardan, sarapshylardan, kýágerlerden jaýap aldyq. Qorǵaýdyń úsh nusqasyn da, memlekettik aıyptaýshynyń negizgi nusqasyn da tekserdik.Bul shamamen 7-8 aıǵa sozyldy. Sot taraptarǵa osy nusqalardyń barlyǵyn jan-jaqty tekserýge múmkindik berdi. Nátıjesinde Tańjaryqovqa qatysty túpkilikti sheshim qabyldandy - oǵan qatysty qylmystyq is toqtatyldy, - Ernar Qasymbekov.
Osyǵan deıin prokýror Nurazhan Myrzaly aıyptaý aktisin oqyǵan bolatyn.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy.
Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
2023 jyldyń jeltoqsan aıynda hosteldiń basshysy ustaldy.