Hosteldegi órt: sot taǵaıyndalǵan úkimge qatysty tolyq aqparat berdi
ALMATY. KAZINFORM – ALA Hostel dırektory Ádilbek Muhamedıarov pen «Gıdservıs» kompanııasynyń ıesi Aleksandr Pekelnıkke shyǵarylǵan úkimdi sot túsindirip berdi.
Tergeý organy Ádilbek Muhamedıarovty Qylmystyq kodekstiń 292-babynyń 3-bóligi boıynsha (órt qaýipsizdigi talaptaryn saqtaý úshin jaýapty adamnyń olardy buzýy, abaısyzda eki nemese odan da kóp adamnyń ólimine ákep soqqan) aıyptady.
Aleksandr Pekelnıktiń isi sotqa Qylmystyq kodekstiń 292-baby 3-bóligi boıynsha berildi, alaıda memlekettik aıyptaýshy sotta bapty QR Qylmystyq kodekstiń 306-baby 3-bóligine (tutynýshylardyń ómiri nemese densaýlyǵy qaýipsizdigine saı kelmeıtin jumystardy oryndaý ne qyzmetter kórsetý, abaısyzda adamnyń ólimine ákep soqqan) ózgertti.
– Sotpen anyqtalǵandaı A. Pekelnık jeke kásipker bola otyryp, úı-jaıdyń menshik ıesi bolyp tabylatyn JShS-men órt dabyly júıesin jetkizý, ornatý jáne iske qosý-baptaý jumystary boıynsha kelisimshart jasasqan. Ol órt qaýipsizdigi talaptaryn saqtaýǵa jaýapty boldy. Sotta ol nysandy ózi baryp kórmegenin, ornatý jumystaryn onyń atyna tirkelgen jeke kásipkerlikpen jumys istegen tanysy O. júrgizgenin moıyndady. Demek, Pekelnık jumystardyń sapasy men qaýipsizdigin baqylamaǵan, tek qujattarǵa resmı túrde qol qoıǵan, - dep habarlady sottan.
Órt dabyly júıesin elektr jabdyqtarymen jumys isteýge ruqsaty men biliktiligi joq adamdar ornatqan. Jumystar jobamen sáıkes kelmegen, ornatýdan keıin dabyl júıesiniń syzbasy rásimdelmegen. Bul Pekelnık óz mindetterine formaldy jáne jaýapsyz qaraǵanyn kórsetedi.
Ádilbek Muhamedıarov órt qaýipsizdigi talaptary men zańnamada kórsetilgen tyıymdarǵa qaramastan, jertóle qabatynda 48 orynǵa arnalǵan 6 jatyn bólmeden turatyn oryn jaılastyrǵan. Sonymen qatar ol evakýatsııaǵa arnalǵan jalǵyz shyǵý esigin qulyptap qoıǵan, bul adamdardyń shuǵyl evakýatsııalaný múmkindigin shektegen. Órtke deıin bes kún buryn hostel ıesi jertóle qabatynyń dálizine matrastar tósep qoıǵan, bul ótetin joldy taryltyp, evakýatsııa jolynda kedergi keltirgen.
Prokýror sottalýshylarǵa 4 jyldan 5 jylǵa deıin bas bostandyǵynan aıyrý jazasyn surady.
Jábirlenýshiler sottalýshylarǵa zańǵa saı jaza taǵaıyndaýdy jáne materıaldyq, moraldyq shyǵyndy óndirýdi surady. Sottalýshylar óz kinálaryn moıyndaǵan joq.
Sot sottalýshylardyń kinásin moıyndamaǵanyna qaramastan, is materıaldarymen, sonyń ishinde órt qaýipsizdigi talaptarynyń óreskel buzylǵanyn dáleldeıtin saraptama qorytyndylaryna súıendi.
Aıyptalýshylardan jábirlenýshilerdiń paıdasyna moraldyq zııan úshin 7 mln teńge jáne materıaldyq shyǵyn ótemaqysy óndirip alyndy.
Sot úkimi zańdy kúshine engen joq.
Osyǵan deıin ALA Hostel dırektory Ádilbek Muhamedıarov 5 jylǵa bas bostandyǵynan aıyryldy, Aleksandr Pekelnık 4 jylǵa sottalǵany týraly jazǵanbyz.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.