Hosteldegi órt: sot advokatqa jeke qaýly shyǵarýy múmkin

ALMATY. KAZINFORM — Almatyda 13 adam ólim qushqan hosteldegi órtke qatysty sot protsesi taǵy keıinge qaldyryldy. Osyǵan baılanysty sýdıa advokat pen aıyptalýshyǵa eskertý jasady.

Sýdıa Ernar Qasymbekov sot otyrysynyń buzylýy birinshi ret emes ekenin aıtyp, aıyptalýshy men onyń qorǵaýshysyna qatań eskertý jasady.

— Ádilbek Muhamedıarov, erteń jeke gıgıenalyq zattaryńyzben kelińiz, óıtkeni sot sizdi advokatyńyz arqyly protsesti ádeıi sozyp otyrsyz dep esepteıdi. Tyńdalym erteń saǵat 10:00–ge shegerildi. Advokat Asylbek Abdraımov kelýge mindetti. Sot oǵan qatysty jeke qaýly shyǵarýǵa quqyly. Ol talaı sot protsesin buzdy, biz únsiz keıinge shegerip kelemiz. Biraq jaryssózge kedergi keltirýge bolmaıdy, — dedi sýdıa Ernar Qasymbekov.

Sýdıa eger sot otyrysy taǵy buzylsa, advokatqa da, aıyptalýshyǵa da shara qoldanylatynyn eskertti.

Ol qorǵaýshy sotqa júıeli túrde kelmeı, protsestiń tártibin buzsa, ony aýystyrýǵa nemese jeke qaýly shyǵarýǵa quqyǵy bar ekenin eske saldy.

Aıta keteıik, Ádilbek Mýhamedıarovtyń qorǵaýshysy Asylbek Abdraımov sotqa kelmegendikten, tyńdalym erteńge shegerildi. 

Buǵan deıin sottalýshylardan jaýap alynǵan bolatyn. 

Osyǵan deıin prokýror Nurazhan Myrzaly aıyptaý aktisin oqydy. 

Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtendi.

Tótenshe jaǵdaı departamentine órt týraly habarlama 05:33–te túsken. Órt saldarynan hostelde 13 adam qaıtys boldy. Mert bolǵan 13 adamnyń tórteýi — sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy — Qazaqstan Respýblıkasynyń azamattary. 

Keıinirek órtengen hosteldiń ıeleri belgili boldy. Hostel ǵımaraty Halyk Bank-ke tıesili. Ony jalǵa alǵan — «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.

2023 jyldyń jeltoqsan aıynda hosteldiń basshysy ustaldy.