Hosteldegi órt: aıyptalýshylarǵa sot úkimi shyqty

ALMATY. KAZINFORM – Almatyda 13 adam ólim qushqan hosteldegi órt isine qatysty rezonansty sot protsesi aıaqtaldy. 

Bir jarym jylǵa sozylǵan hosteldegi órtke qatysty iske núkte qoıyldy. Úkimdi Almaly aýdandyq sotynyń sýdıasy Ernar Qasymbekov shyǵardy.

Іs Qylmystyq kodekstiń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha qaraldy.

Aıyp eki adamǵa taǵyldy. Olar – ALA Hostel dırektory Ádilbek Muhamedıarov pen «Gıdservıs» kompanııasynyń ıesi Aleksandr Pekelnık.

Sot barlyq mán-jaıdy eskerip, kelesideı úkim shyǵardy: 

ALA Hostel dırektory Ádilbek Muhamedıarov 5 jylǵa bas bostandyǵynan aıyryldy, Aleksandr Pekelnık 4 jylǵa sottaldy. Olar jazasyn qaýipsizdik deńgeıi tómen mekemede óteıdi. Ekeýi de sot zalynda qamaýǵa alyndy.

Buǵan deıin sottalýshylardan jaýap alynǵan bolatyn. 

Condaı-aq sýdıa isti prokýratýraǵa qaıtarýdan bas tartqany týraly jazǵanbyz. 

Osyǵan deıin prokýror Nurazhan Myrzaly aıyptaý aktisin oqyǵan edi. 

Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn. 

Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy. 

Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary. 

Keıinirek órtengen hosteldiń ıesi belgili boldy. Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan. 

2023 jyldyń jeltoqsan aıynda hosteldiń basshysy ustaldy.